Bizdiń saýsaqtarymyz ártúrli ǵoı, bireýi uzyn, bireýi qysqa. Bas barmaq sál kishileý, balaly úırek odan uzyn, eń úlkeni ortan terek degen sıaqty. Ózińiz oılańyzshy, endi osy saýsaqtardy teńestirip tastasaq ne bolady? Qolymyz sharýaǵa ıkemdelmeı, yńǵaısyzdyq týmaı ma? Bizge neniń paıdaly, neniń zıan ekenin biletin Alla Taǵala, tipti, saýsaqtarymyzǵa deıin kórkem, ári ózimizge yńǵaıly etip jaratyp berdi emes pe? Sol sıaqty Alla taǵala ómirde ár adamnyń óz ornyn aıqyndap bergen. Úıdegi ákeniń orny, ananyń mindeti, balanyń qyzmeti, ata men ájeniń dárejesi degen sıaqty. Bular óz ornynda turǵanda ǵana, otbasynda úılesimdilik pen tynyshtyq, bereke bolady. Mysaly, bir kásiporynǵa bir kisi kelip, "búginnen bastap báriń teń quqyqqa ıe boldyńdar. Bul jerde eshkim basshy emes. Árkim ózi bı, ózi qoja" dese, ne bolady? Ol jerdiń jumysy kóp uzamaı-aq toqtap, kásibi qurdymǵa ketedi. Sondyqtan qaı kezde de myna nárseni umytpaǵanymyz abzal:

"Erkek basqaryp, al áıel baǵynyp baqytty bolady"
      Osy qarapaıym ǵana formýla - kóp urystyń aldyn alatyn negizgi kilt. Áıel – sezimniń adamy. Emosıaǵa berilip, qate sheshim jasap qoıýy, asyǵystyq tanytyp shalys basýy múmkin. Al Alla erkekke sezimtaldyqtan góri salqynqandylyq, nurly aqyl bergen. 

Iá, áıel adam erinen góri aqyldyraq bolýy yqtımal. Eri bilmeı turǵan keıbir jaıttardy áıeli bilip turýy múmkin. Biraq báribir Alla Taǵala erkektiń sheshimine bereke berip qoıǵan. 

Sondyqtan erli-zaıyptylar ár isti aqyldasyp, ózara keńesip jasasa, jemisin de dál solaı birge kóreri anyq. 

«Asyl arna» ınstagram paraqshasynan alyndy