Beıbit kúnde shyrpy jaqqan el edim,
Búlk etpegen búırek netken er ediń!
Keshirińder!
Jetkize almaı shyndyqty
Beseýińdi órtke oraǵan men edim!
Ózderińe tolǵaý jazyp júr áli,
Shyǵady erteń ánshiniń de bir áni.
Keshirińder!
Senderdi emes solardy,
Jazyp júrgen bizdiń qoǵam kináli!
Biz órtedik ony biz de sóndirgen,
Bizdi qoǵam «kún salýǵa» kóndirgen...
Keshirińder!
Bári jaqsy bolad(y) dep,
Kinási bar senimniń de sendirgen!
Umytamyz ózderińdi biz áli,
Búgin júrek qaıǵyrady, yzaly...
O,Táńirim!
Shyryldaǵan daýysqa,
Sabyr saqtap otyrsyz ba siz áli?!
Marǵulan Aqan
***
Shapaǵatshy
...Bul qoǵamnyń unamady-aý bir isi,
(sher shólmegin bosata alar kim iship?!)
Bes Perishte - jasyl qanat bes Sábı,
Kókke ushyp kete bardy tún ishi.
Úrker qaıda -
Tóbede me?
Batysta?
Ne joramal - búk túsip bul jatysqa?!
Kete bardy bes Perishte - bes Sábı,
Qala almady jalyn qamap,
Ot ustap.
Jyla, júrek,
Júde, kóńil, oıazyp,
Berer me eken Kún emshegin,
Aı azyq?
Ustap qala almady ǵoı Arqanyń
Aq shalmaly aıazy.
Endi oralmas,
Meken bolmas kir ǵalam -
Myń boıaýly dúnıesin buldaǵan.
Eske salyp egiltedi bizderdi,
Kúl ornyna ósken raıxan gúl ǵana.
Dańǵazaǵa burmas qaıta moıynyn,
Eliktirmes "Úıshik-úıshik" oıyny.
Terezeden jaýtań qaǵyp janarlar,
Tas qaladan izdemeıdi meıirim...
Azam - aýyr,
Qaıǵym - qalyń,
Oı - tereń,
Biraq bizdi túsinbeısiń, BÁITEREK...
Butaǵyńa qonaqtaıtyn balapan,
Aspanǵa aýyp kete barsa qaıter eń?!
Jumaq kirer -
Saraı,
Haýyz,
Kil shaǵı,
Ertegiler álemindeı tumsa kúı.
...alaqanyn jaıyp maǵan talpynyp,
Túsimde ylǵı órtenedi bir Sábı.
Men de muńdy,
Týǵan ólkem jyraqta,
Qansha taǵdyr tamuq keship, júr otta.
Sol Sábıdi keýdeme ákep arýlap,
Jýyndyram kózden aqqan bulaqqa...
Bes Perishte támamdalmas sapary,
Shyraq jaǵyp júrer túnge ot alyp.
...Shapaǵatshy bolsyn saǵan Sábıler,
Meniń sorly,
Meniń uly Otanym!
Murat Shaımaran
Pikir qaldyrý