Qara tún aldy – keshki ińir,
İńirden zaýal esti bir.
Shybyndap bizder júrgende,
Shyryldap ketti bes ǵumyr.

Saraıdan saraı salamyz,
Ne qylǵan soqyr sanamyz?
Ókirip jatyr ata-ana,
Órtenip jatyr balamyz.

Daýasyz sorǵa soqtyqqan,
Osynyń bári – joqtyqtan.
Semirip alǵan kóp serke,
Sekirip júr ǵoı toqtyqtan.

Qýdala, meıli shetke qaq,
Jańqalap, jaryp otqa jaq!
Qaı qýys, qaıda barsań da,
Qańǵyryp júrgen kóp qazaq.

Joqshylyq qana – úlesi, 
Halqymnyń kórgen kúni osy!
Qashanǵa deıin jalǵasar,
Baı menen kedeı kúresi?

Qańǵyryp júrip páterde,
Uryndy qaýsap qaterge.
Baıqustyń munda úıi joq,
Úıi joq jáne shetelde...

Boıyna aram boq singen,
Shesheýnik qansha tepsingen.
Mınıstr ketsin ornynan,
On alty myńdy kópsingen!

Jelkildep ósip jetpeı me,
Balasyz ómir kókteı me?
Órtenip urpaq ólgenshe,
Órtenip dúnıe ketpeı me?!

Nesipbek Aıtuly