Kópbalaly analar úshin aqshany qaıdan alýǵa bolatynyn men bilemin. «Ana» degen kádimgi mamandyqtyń bir túrine aınalýy tıis. Bir bala týdyń ba – aıyna 100 dollar alasyń, ekinshi bala úshin – 200 dollar, úshinshi balańdy dúnıege ákelseń – 300 dollar. Tórtinshi balańdy týdyń, avtomatty túrde páterli boldyń. Munyń bári qaıyrymdy memlekettiń syılyǵy bolady. Besinshi bala úshin 500 dollar, taǵysyn taǵy...

Sizge bul múmkin emesteı kóriner ári kúlkili shyǵar, ıá? Beker!

Bul - ulttyq qaýipsizdiktiń máselesi! Bul tipti memlekettigimizdi saqtaý máselesi!

Bir ǵasyr buryn qazaq halqynyń teń jartysy qyryldy. Sovet ımperıasy qolmen jasaǵan asharshylyq, genosıd bolmaǵanda, búginde qazaqtardyń sany 50 mıllıonǵa jeter me edi... Ne kerek, búgin sanymyz 10 mıllıonnan sál ǵana asady.

Shynynda biz óz elinde tili men tarıhyna degen quqyǵyn áli kúnge deıin dáleldeýge tyrysyp, jantalasyp júrgen, tipti joıylýǵa shaq qalǵan halyqpyz.  Bul tyǵyryqtan shyǵýdyń bir ǵana joly bar, ol – geometrıalyq progreske jetý.

10 jyldan keıin bizdiń sanymyz qazirgiden bir jarym esege artýy tıis, al 20 jyldan keıin eki esege artamyz.

Bizge azýly aıý men qý aıdaharǵa qarsy tura alatyn Batyrlar kerek! Jáne bizge sondaı Batyrlardy dúnıege ákeletin analar kerek! Bilesizder me,  bizge kem degende 35 mıllıon azamaty ómir súretin memleket qajet. Sebebi sondaı el ǵana ózin-ózi qamtamasy ete  alady ári ishki naryqqa ıe bola alady.

Al munyń bárine aqshany qaıdan alamyz? Bárińizdi alańdatqan suraq ta osy.

Bizde ondaı aqsha óte kóp. Tek sonyń bári túkke turǵysyz dúnıelerge shashylyp jatyr. Máselen, Shýchınskidegi tramplındi alyp qaraıyq. Ony salýǵa memleketten 1 mıllıard dollar qarjy jumsaldy.

Memleket ishinde júzge jýyq sportshy tramplınnen sekirýmen aınalysady. Onyń ústine Almatyda bir tramplın onsyz da bar. Shýchınskidegi qys mezgiliniń 150 kúniniń jartysynda temperatýra 20 gradýstan tómen bolyp turady. Iaǵnı ushýǵa bolmaıtyn ýaqyt. Qalǵan 50 kúnniń 40 kúninde qatty aıaz bolady, onda da ushýǵa tyıym salynady. 5 kún qalady. Sol 5 kún úshin bizdiń bılik 1  mıllıard dollar aqsha jumsady.

Anyqtama retinde ekonomıkasy bizdiń elden 50 esege joǵary Ulybrıtanıada tramplın áli joq.

Astanany alaıyq.

Pıramıdada 1300 oryndyǵy bar opera sahnasyn biletin bolarsyz... Joq, bul az ǵoı, onyń janyna «Qazaqstan» konsert zalyn salyp qoıdyq. Ol da az boldy, taǵy opera teatryn saldyq. Nege? Mıllıardtaǵan dollarlardy nege beker shashyp jatyrmyz? Álgi pıramıda jylyna 10-15 kún jumys isteıdi, konsert zaly da solaı. Onyń ústine ol jerde eshkimge paıdasy joq sharalar ótedi. Al ol ǵımarattardyń jylýy men ózge de qyzmetteri úshin taǵy memleketten mıllıondaǵan dollarlar bólinedi emes pe?

Kıeli Túrkistan qalasyn oblys dep atadyq ta, úlken-úlken saraılar salýǵa kiristik. 200 mıllıon dollardaı aqsha taǵy ketti.

Baryp turǵan aqymaqtyq... Tramp eldegi shtattarǵa sondaı nysandar salyp kórsinshi, «esalań» atanyp, halyqtyń qýdalaýyna ushyraıdy.

Munyń bári bıznesmen Genrı Fordtyń aıtýynsha, «túbi kedeılikke ákeletin «óli denelerdi tasý» áreketi».

Men tek birneshe mysal keltirdim... Bul «óli denelerdiń» artynda Qazaqstannyń kartasy jatyr.

Eger ár nysannyń ózi bir-bir panteon bolsa, bizge taǵy Panteonnyń ne qajeti bar? «Qorqaq úkimet» pen ótirikshi depýtattardyń panteony da jetedi emes pe?

«Óli denelerdi» ári - beri tasýdy doǵaraıyqshy?! Kúni keshe bes balaqaıdy shynaıy jerledik.

Ómirimizde bir ret bolsa da shynaıy ister atqaraıyq, búgingi jáne bolashaq Analarymyz úshin jaqsylyq jasap, tirisinde aıaqtaryn súıip óteıik!

Arman Shoraevtyń Facebook-tegi paraqshasynan aýdaryldy

Aýdarǵan: Gúlim Jaqan