Shymkentte úshinshi qabattan sekirip ketken qyz ózin kúshpen alyp qashqan jigit týraly aıtyp berdi, dep habarlaıdy Qamshy.kz aqparat agenttigi Eýrazıa birinshi arnasynyń deregin negizge alyp.
19 jastaǵy qyz ózin-ózi óltirmek bolǵan. Er adam alyp qashyp, zorlap, qorlyq kórsetip, áıeli bolýǵa májbúrlegennen keıin osyndaı jantúrshigerlik qadamǵa barǵan. Boıjetken óziniń "qaqpanǵa" qalaı túsip, qandaı sumdyqty bastan keshkeni týraly aıtty.
Qańtar. Jyl basy. Bolashaqqa jańa qadam basqan shaq. Stýdent qyz daıashy bolyp júrgen dámhanadaǵy kútpegen tanystyq onyń ómirin bastan-aıaq ózgertip jiberdi. Kelgen qonaq boıjetkendi unatyp, telefon nómirin suraǵan. Birinshi kezdesýden keıin-aq qyz jigitpen ári qaraı aralasqysy kelmeıtinin túsinedi. Betin qaıtarǵanyna tózbegen er adam jas qyzdy alyp qashypty.
"Telefonymdy tartyp alyp, óshirip tastady. Aq oramal alyp shyqty. Basqa bólmede áıelder kóp bolatyn. Biraq men "qalmaımyn" dedim. Qulaq aspady", deıdi jábirlenýshi.
"Kúıeý jigitpen" jynystyq qatynasqa túsýge qyz úzildi-kesildi qarsylyq bildirgen. Buǵan kúdiktengen "ata-enesi" birden gınekologqa alyp baryp, páktigin teksertipti. Keıin jastardy jaldamaly páterge jiberedi.
"Qyzdyń yqtıarymen eshteńe bolmaǵan. Ony májbúrli túrle páktiginen aıyrdy. Zorlady. Ol muny qalamaǵan edi. Barynsha qarsylyq kórsetti. Oqıǵa 25-i kúni bolyp, 27-si kúni qaıtalanǵan. Biz sotqa deıin jetkizemiz", dep habarlady jábirlenýshiniń zańdy ókili Erkin Qaharov.
Boıjetken uzaq ýaqyt boıy ózi tap bolǵan otbasynyń qorlyǵyna ushyraıdy. Betine túkirip, tipti soqqyǵa da jyqqan... 31 qańtar – óziniń týǵan kúninde sharasyz kúıge túsken jábirlenýshi dári iship alyp, úshinshi qabattan sekirip ketedi. Abyroı bolǵanda, aman qalypty. Qazir bas súıek-mı jaraqatyn alyp, omyrtqasyna zaqym kelip aýrýhanada jatyr.
"Kóz aldymda ólip kete jazdady. Qyzymdy olardyń úıine jibergim kelmeıdi. Ózderi betpaq. Enesin kórdim. Qyzymdy qarǵap siledi. Olar bizge hat joldaǵan bolatyn, qyzymnyń jazýyn tanyǵanmyn. Sóıtsem, jazýǵa májbúrlepti. Dástúrge saı týystarymdy jiberdim. Biraq álgiler qyzymyzǵa jolatpaı qoıǵan", - deıdi jábirlenýshiniń anasy.
Budan buryn Shymkenttiń polısıa departamenti habarlaǵandaı, 31 qańtarda 19 jastaǵy qyzdyń ózin óltirmek bolýyna qatysty QR QK 105-baby "Ózin-ózi óltirýge deıin jetkizý" boıynsha sotqa deıingi tergeýler júrip jatyr. Kúdikti anyqtalyp, ál-Farabı aýdandyq polısıa bólimine jetkizilgen. Oqıǵanyń mán-jaıy anyqtalýda.
Usynǵan: Ásel Bolatqyzy
