Qaıran qazaq qalaı ǵana kóp bolar
Bizder órtep jiberdik –
Bes balany – bes gúldi…
Perishteler-
Peıishke ushyp ketti olar,
Mazalamas endi qyzdar eshkimdi…
Shekesi tar sheneýnikter usaqtap,
Balalardyń nesibesi tonaldy….
Aıazynda Astananyń birin-biri jylytýmen qushaqtap,
Jatqan qyzdar jalyndy otqa orandy…
Budan keıin bizderge kim senedi?
Kókteı soldy qyzǵaldaqtar kókórim…
Kókke ushyp ketti olar, sebebi,
Jer betinde perishtege joq oryn!..
Beıkúnálar, azabyńdy tartamyn,
Júregime salar izin ár syz kún…
Shydady olar aıazyna Arqanyń,
Shydamady aıazyna atqaminer arsyzdyń…
Qyzyl otqa qıdyq qalaı qyzdardy,
Aıaz bı joq – aldan olar ne kútti?.
Aıazbetter bolǵannnan soń yzǵarly,
Aıaz Ata jarylqar dep senipti…
Aqordamyz turǵan asqaq qalada,
Bes perishte kúlin kókke ushyrdy…
Qyzylorda – Qarmaqshyda qarmaq salyp balaǵa,
Ýly tútin tunshyqtyrdy úsh uldy…
Aýzyn ashsa, óleń emes… Zar shyqqan,
Qalamyn tek qarý etken aqynbyz.
Bala jasaı almaı júrip balshyqtan,
Barymyzdy órtep kele jatyrmyz…
El senetin erlerimiz qaıda álgi?..
Turmystyń bul tumany áli torlaýda…
Áleýmettik qorǵaýymyz aınaldy-
Áleýmetti qorlaýǵa!..
Táýelsizdik – baǵym-barym dep kelem,
Áıtpese kóp júrektegi jaramyz…
Bes perishte qazasyna
Betteri búlk etpegen
Bılikpenen bizder qaıda baramyz?!.
Qasıetsiz tabysa almas kóp elmen,
Qasiretti ata-ananyń tańdaýy dep taýypty…
Tilsiz jaýdy kinálaımyz, degenmen,
Betsiz jaýlar bárinen de qaýipti!..
Soǵys joqta qurbandyqtyń aldy emes bul, arty da…
Boldy bizge bıyl kelgen qys aýyr…
Ákim eger jaqyn bolsa xalqyna,
Alty ulymyz bolar edi alty aýyl!..
ÁlıNur dep qoıǵan atyń keremet!
Sherin qalaı tarqataıyn kóńildiń…
Nur bolsa da esimińde, ne kerek
Nuryn kórmeı kettiń mynaý ómirdiń…
Abzal degen atyń qandaı qaraǵym,
Aldaryńda kóp qoǵamnyń qaryzy…
Aldıar dep qoısa da atyn balanyń,
Aldıarǵa jetpeı ketti aryzy…
Baspanasyz qaldy qazaq qys kúni,
Perzentter joq
Tirlikten bul mán qashty…
Balalardy órtegen ot ushqyny
Analardyń jalynyna jalǵasty!..
Uran bolar Ulttyń qashan bar úni,
Qutqarady quldyqtan kim sanany?
Ózegimdi órtegen ot jalyny
Janymdy órtep barady…
Súrinetin súıeksińdi súrede
Teksizdikten bizge baqyt joq qonar…
Tilin bilmes – tirligińdi bile me!
Shet tilinde sóıleıtinder shet bolar!..
Dar aǵashyn daıyndaǵan daraǵa,
Turmyspenen tusaý salyp danaǵa,
Tıyn-teben tastap qoıyp balaǵa,
Bar baılyǵyn shashyp kelgen dalaǵa,
Úkimetke úkim eter kún keldi!
Shyǵaraıyq ishten tynǵan úndi endi-
Siz qaıdasyz, Ultqa qaryz Nar aǵa?!
Ermiz be biz, Elmiz be biz –
Endeshe,
Ber Bostandyq sanaǵa!
Qazybek Isa
Usynǵan: Ásel Bolatqyzy
