Magomed Ozdoev Besqaraǵaı aýdany Jylandy aýylynyń turǵyny. Jasy 37-de. Ózi balalar úıinde ósken, anasy bala kúninde bas tartqan eken.

Er adam 1982 jyly Almatydaǵy Túrksib aýdanynda dúnıege keldi. Jarkenttegi balalar úıinde tárbıelendi.

«9 synyptan keıin meni jáne taǵy birneshe balany múgedekter úıine aparyp tastady. Ol jerde dene bitiminde jáne mıynda aýytqýshylyǵy bar múgedekter turatyn. Al meniń sabaq úlgerimim nashar boldy, synyptan-synypqa óte almaı júrgendikten sondaı balalardyń arasyna tústim», - dedi Magomed.

Alaıda dál sol jerden aıaǵynan tik turýǵa kómektesken, demegen jandardy kezdestirgen eken.

«Balalar úıinde júrgende biz bólek álemde ómir súretin edik. Ol álemdi ózimiz jasap alǵanbyz. Eshkimge kerek emes edik, bizdi de oılaıtyn eshkim joq. Al múgedekter úıinde óte meıirimdi jandardy jolyqtyrdym. Ózderin «táteshka» dep ataıtynmyn. Olar ımandy, namaz oqıtyn otbasyly áıelder. Ári maǵan da qatty qoldaý kórsetti. 22 jasynda óz qamqorlyǵyna alyp, úı satyp alýǵa, halyqtyń arasyna shyǵýǵa kómektesti», - dedi er adam.

Týǵan týystary Magomedtiń esinde emis-emis saqtalǵan.

«Bala kúnimde bir áıel meni baseınge aparatyn, jo-joq, ol balalar úıinde emes edi. Ol baseınde bizben birge taǵy eki bala júretin. Álgi áıel qarapaıym kıingen. Onyń ústine, balalar úıine boıy uzyn jigit kelip, meniń aǵam ekenin aıtatyn. Qıyndyqqa tap bolsam, kómektesýge daıyn ekenin aıtty. Itimen jıi kelip turatyn», - dep er adam balalyq shaǵyn esine aldy.

Al qazir Magomedtiń óz otbasy bar. Áıeli Aqmaral ekeýi eki uldy tárbıelep, ósirip otyrǵan ata-ana. Alaıda Magomed úshin bul jetkiliksiz, týǵan anasynyń tabylǵanyn qalaıdy.

«Anamdy kórgim keledi, qushqym keledi. Aıtarym da, surarym da kóp. Múmkin bolsa, ákemdi de tapsam deımin. Baýyrlarym da bar shyǵar, kim biledi?!», - dep boljaıdy ol.

Magomedke áıeliniń ata-anasy óz balasyndaı qaraıdy eken. Olarǵa kúıeý balasynyń alǵysy sheksiz.

«Ózimniń týǵan anamdy taba almaı júrgende enemdi «ana» deı almaımyn. Meni alqash nemese aıaǵyn kóterip qoıyp, úıinde jatatyn dıvansúıer dep oılap qalmańyzdar. Men – moldamyn, úıim, balalarym bar, orman sharýashylyǵynda  kúzetshi bolyp jumys isteımin. Mende bári bar, tek anam janymda bolsa ǵoı», - dep syrymen bólisti.

Magomedti «molda» dep jergilikti turǵyndar aıtyp ketken eken. Molda bolmaǵan kezde aýyl jurty Quran baǵyshtaý úshin Magomedke barady.

«Men medresede oqydym. Arab tilin meńgergenmin, Qurandy jatqa bilemin. Alaıda kórý qabiletimde kemistik bar. Múmkin, anamda da solaı bolǵan shyǵar?», - dep sózin qorytyndylady aýyl moldasy.

Magomed anasyn óz betinshe taýyp kórgisi kelgen. Alaıda nátıje shyqpady. Anasynyń esimi – Ozdoeva Zınaıda Magomedovna. 1953 jyldyń 20 naýryzynda dúnıege kelgen. Almaty qalasyndaǵy Borzova kóshesinde turypty.  

NewTimes.kz saıtynan aýdarǵan: Gúlim Jaqan