-Búgin bir tús kórdim... Ádemi aqboz atqa minip alyp...

-Úlken jetistikterge jetesiń! Armanyń oryndalady...

***

-Túsimde pálensheniń balasy kóz jumypty deımin... Birtúrli shoshyp, denem túrshigip oıandym...

-Ee, onyń ómir jasy uzaq bolady. Kóńilińe alma, tús túlkiniń... 

...

 Pah-Pah! Netken, ǵajap tús! Qazaǵym jorıdy-aý! Durys, árıne! «Jaqsy sóz-jarym yrys» degen de ózimiz. Jaqsyǵa joryp, jamannan da jaqsylyq kútkenimiz-erteńgi kúnge senip, bir úmitke jeleý beretini bolar.

Biraq deımin da, jaqsy tús kórsek, «Tańǵa jýyq kórdiń be? Ol-aıan tús qoı! Buıyrsa, bir jaqsylyqtan úmitten!», «Oıbaı, munyń keremet qoı! Baılyqqa keneleıin dep tursyń-aý!»...taǵy basqa, «ǵajap» qylyp joryp jiberemiz!.

Al, «nashar» tús kórsek, ony qaı ýaqytta kórgenimizge qaramastan, «áı, sen alańdama, tús túlkiniń birdeńesi...», «ýaıymdaǵan soń kórgensiń ǵoı», «túske ne kirmeıdi...» taǵysyn taǵy joqqa shyǵaramyz. Ony álgindegi sózsiz oryndalatyn aıan tús ýaqytynda kórgenimizdi de eskermeımiz.

Árıne, bul da durys. Kim jamandyq qalaıdy deısiz? Túste turǵan ne bar? Ánsheıin, óńińde elenbeı qalǵan oılar nemese uıqy áleminiń jarnamalary ǵoı...

Tústiń de úsh túri bar.

1. Shaıtanı túster: Shaıtannyń adamdy qorqytyp, janyn qınap, ýaıymdaıtyp, oıyna qaıǵy salý nıetpen kórsetetin tústeri. Mysaly, quzar shyńnan qulaý nemese júregiń alqymǵa tyǵylǵandaı úreımen shoshyp oıanatyn, jalǵyzdyqta, qarańǵyda, tuńǵıyqta qalyp qoıǵandaı áser beretin kórinister kórý. Mundaı tústerde túk negiz joq. Sol sebepti, osyndaı bulyńǵyr, túsiniksiz, úreıli túster kórgen adam ol túsin eshkimge aıtpaı, tún ortasynda shoshyp oıanǵan bolsa, sol jaǵyna úsh ret úrlep, alaqanyn jaıyp, Allaǵa shaıtannyń azǵyrýynan syıynýy kerek. 

2. Jadyda saqtalyp qalǵan syrtqy ortanyń áserinen kórgen túster: Bul tús túrine adamnyń jeke óz jaǵdaıy men qıalyna baılanysty túsinde kórgen kórinisteri jatady. Mysaly, kúndiz, oıaý kezde qazy-qarta, qurt, ıaǵnı, tuzdy taǵam jegen bolsańyz, kóp sý iship júrgenińizdi kórýińiz múmkin nemese áldebir nárseni kóp oılaı berseńiz, sol túsińizge enýi múmkin. Bul sekildi tústerdi de jorýdyń qajeti joq. Esh negizi joq túster. 

3. Shynaıy túster: Bul – este aıqyn saqtalatyn túster. Bul Alla Taǵala tarapynan súıinshi, eskertý retinde kórinetin túster. Iaǵnı, aldaǵy bolatyn jaqsylyqtan, sáttilikten, jaǵymdy jańalyqtan kelgen shúıinshi habar ispetti.

Shaıtanı tústi uıqynyń kez kelgen ýaqytynda kóre beremiz. Al syrtqy ortanyń áserinen kóretin tústerdi kóbinese basyńdy jastyqqa qoıa sala kórýiń de yqtımal. Iaǵnı, kúndiz kóp oılap júrgen dúnıeni, kóziń ilinip ketkende kórýiń múmkin. Al aıan tústi, ıaǵnı, shynaıy tústi, kóbinese, tańǵa jýyq kóredi deıdi adam. Sondyqtan, tańǵa jýyq kórgen túske kóbirek mán berý kerek. Qyzyq. Jalpy qaı dúnıege bolmasyn muqıat qarasań, oıly adamǵa oı tastary anyq...

Jaqsy, jaǵymdy, qýanyshty tústerimiz kóp bolsyn! Tek túsimizde ǵana emes, óńimizde de baqytty bolaıyq!

Maqpal Sembaı