Qazaqstandyq boksshy Gennadıı Golovkın (38-1-1, 34 KO) taıaý kúnderi orta salmaqta WBO tujyrymy boıynsha álem chempıony Demetrıýs Andrademen (27-0, 17 KO) sharshy alańda judyryqtasýǵa múmkindik alyp qalýy ǵajap emes. Bul týraly Búkilálemdik boks uıymynyń (WBO) prezıdenti Fransısko Valkarsel BoxingScene basylymyna bergen suhbatynda málimdedi, - dep habarlaıdy Qamshy.kz aqparat agenttigi Vesti.kz saıtyna silteme jasap. 

Aqpanda jańartylǵan reıtıńte Gennadıı Golovkın orta salmaqta Búkilálemdik boks uıymynda (WBO) kósh bastady. Osylaısha, ol Demetrıýs Andradeniń (27-0, 17 KO) ıeligindegi WBO belbeýine mindetti qarsylas bolady degen sóz.

"Bálkim biz irikteý kezdesýin ótkizemiz, ıa bolmasa Golovkındi Andradege mindetti qarsylas etemiz. Biz osy máseleni 21 aqpanǵa deıin sheshýimiz kerek", - dedi Valkarsel.

Osyǵan deıin reıtıńte WBO burynǵy chempıony Bıllı Djo Sonders birinshi turǵan, alaıda ulybrıtanıalyq boksshy ekinshi orta salmaqqa kóterildi.

Qańtarda Golovkın DAZN strımıngtik júıesimen jáne FOX pen Showtime arnalary arqyly translásıa júrgizý úshin Premier Boxing Champions jobasynyń ókilderimen kelissózder júrgizdi. DAZN ókilderi qazaqstandyqqa Andrademen jekpe-jek usyndy, keıin Saýl Alvarespen (51-1-2, 34 KO) úshinshi kezdesý ótkizý usynysy da bolǵan.

Aıta keteıik, WBO belbeýi - Golovkın kásipqoı boksta ala almaǵan jalǵyz tıtýl. Ol birneshe ret Sonderspen kelissózder júrgizdi, alaıda jekpe-jek uıymdastyrý múmkin bolmady.

Usynǵan: Nazerke Labıhan