Astanalyq kásipker qala shetinde bólme jaldap otyrǵan kópbalaly ana Janar Ýzdenbaevaǵa 3 bólmeli páter sılady. Qaıyrymdy jan anonım qalǵysy keldi. Bul týraly jańa turǵyn úılerdiń biriniń Instagram jelisindegi paraqshasynda jarıalandy, - dep habarlaıdy Qamshy.kz aqparat agenttigi Tengrinews.kz saıtynyń deregine súıenip. 

Kompanıa ókilderiniń aıtýynsha, munyń aldynda shaǵyn jáne orta bıznesi bar kásipker qymbat kólik satyp alǵaly júrgen. Biraq órt shyqqan oqıǵadan keıin lúks avtosalonnan jınalǵan 17 mıllıon teńgesin qaıtaryp alyp, olardy qurylys kompanıasynyń satý bólimine alyp kelgen. 

"Bul soma 3 bólmeli páterge jetpeıtindikten, kompanıa ústine 7 mıllıon teńge qosyp, Ýzdenbaevtar kóktemde daıyn turǵyn úıge kóshe alý úshin jóndeý jumystaryn da moınyna aldy", - dep naqtylady kompanıa ókilderi.⠀

"Bul jańalyqty habarlaǵanda senbedim. Tús dep oıladym. Al satý bólimine aparǵanda (...), qýanyshymda shek bolmady. Bárinen qyzdarym baqytty. Endi olarda armandaǵandaı óz bólmesi bolady. Barlyǵyna kóp rahmet", - deıdi Janar Ýzdenbaeva kóz jasyn tıa almaı. 

Aıta ketken jón, áıel jalǵyz ózi alty bala tárbıelep otyr. Kúıeýi 2015 jyly Janar eń kishi balasyna júkti bolǵanda qaıtys bolǵan. Osydan keıin ol 85 myń teńgege 1 bólmeli turǵyn úı jaldap turýǵa májbúr bolǵan. 

Jartysyn ápke-qaryndastary tóleýge kómektesken. Áıeldiń turaqty jumysy joq, sebebi eń kishisi nebári 3 jasta. Ol aı saıyn balalary úshin 78 000 jáne 28 000 teńge áleýmettik kómek alady. Biraq bul jetkiliksiz, - deıdi "Kúmis alqa" medaliniń ıegeri, - sebebi qarajattyń kóbi bir balanyń kórý qabiletin túzetýge jáne ekinshisiniń sóıleýin damytýǵa jumsalady. Ákesi qaıtys bolǵannan keıin bala sóılemeıdi", - delingen jarıalanymda.

Usynǵan: Nazerke Labıhan