Úkimetti basqarǵan eki sheneýnik synyptastar bolǵanyn bildińiz be? 2007-2012 jyldary QR Premer-mınıstri bolǵan Kárim Másimov pen búgin ǵana, ıaǵnı 2018 jyldyń 25 aqpanynda Úkimet basshysy bolyp taǵaıyndalǵan Asqar Mamın Kırov atyndaǵy №1 elıtalyq mektepte bir synypta oqydy. Alaıda Másimov tórtinshi synypta basqa mektepke aýysqan. Bul týraly «Megapolıs» basylymynyń 2007 jylǵy sanynda jarıalandy.
Mektep sol kezdegi Selınograd qalasyndaǵy eń úzdikterdiń qatarynan tabyldy ári matematıkalyq baǵytty tereńdetip oqytqan. Tipti onda oqýdyń ózi oqýshylar úshin arman bolǵan desedi. Sebebi qalanyń eń bilimdi pedagogtary sonda jınalǵan. Al búginde bılikten oryn tepken sheneýnikter mektepti úzdik bitirgen.
Mamın men Másimovke sabaq bergen Mará Isakqyzy (qujat boıynsha esimi – Múslim Aısaqqyzy) basylymǵa suhbat ta beripti. Suhbat barysynda sheneýnikterdiń qandaı oqýshy bolǵanyn aıtyp berdi.
«Balalar jaqsy oqydy. Mamın ortańǵy qatardyń birinshi partasynda otyratyn. Tártipti bala boldy, biraq anda-sanda qylyqtaryn kórsetip qoıatyn. Birde barlyq oqýshy «kartop jınaýǵa» shyqqanda, Asqar dostarymen qashyp ketken. Al kelesi kúni mektepke ata-anasymen ǵana kirgizildi. Men qatal bolatynmyn. Buzyqtyq jasaǵan oqýshylardy buryshqa turǵyzyp qoıatynmyn. Asqar da synyp buryshynda jıi turdy. Azdap qýlyǵy bar edi. Janynda otyrǵan oqýshylardan kóshirip alatyn, sol úshin de ony jıi jazalaıtynmyn. Al jalpy tynysh bala boldy.
Kárim de jaqsy oqydy. Áli esimde, aýyr sómkemen jaıaý ketip bara jatqanymda Kárim men dostary maǵan sómkemdi kóterisýge kómektesken», - dep esine túsirdi Mará Isakqyzy.
Mará hanym qazaq tili páninen sabaq beripti. 1972 jyly Másimov pen Mamın 1-i synypqa barǵanda, Isakqyzy da jumysqa ornalasqan. Sol kezde qazaq tilin azdap meńgergen oqýshylardyń biri Mamın bolǵan eken.
«Kóbi qazaq tilin bilmeıtin. Al Mamın bildi, biraq sóıleýge uıalatyn. Suraq qoısań, úndemeı turady. Nemese «Ne znaıý» dep jaýap beredi. Eki de, úsh te alatyn, biraq tórtke oqydy. Sebebi qazaq tilin biletin biren-saran oqýshylardyń biri edi. Másimovke de tórt qoıatynmyn. Biraq ol baǵaǵa laıyqty emes edi. Ózge pánderdiń bári bestik bolǵandyqtan, amal joq, tórt qoıatynmyn. Al qazaq tilin bilmeıtin, qazirdiń ózinde bilmeıdi ǵoı. Birde tanysym: «Mará Isakqyzy, oqýshyńdy durys oqytpaǵan sekildisiń» dep uıaltqan bolatyn. Kárimge sol kezde qataldyq tanytýym kerek edi», - degen Mará ustaz ókinishin de aıtyp qaldy.
Mará Isakqyzy oqýshylarynyń osyndaı dárejege kóterilgenderi úshin maqtanady, árıne. Tek ekeýi de bilim alǵan mektepterine bitirgen soń aıaq baspaǵan eken. Soǵan qapaly...
Aıta keteıik, búgin, 25 aqpan Parlamenttiń maquldaýymen Asqar Mamın QR Premer-mınıstri bolyp taǵaıyndaldy.
