Estonıa prezıdenti Kerstı Kalúlaıd óz elinde aldaǵy ýaqytta orys tilinde bilim berýdi múlde toqtatatynyn málim etti. Onyń da sebebi bar. Estonıa táýelsizdiginiń 101 jyldyǵyna arnap halyqtyń aldynda sóılegen sózinde ol «elde biryńǵaı bir tildi bilim berý júıesin engizgen durys sheshim» dep málimdedi.

Prezıdent Kerstı Kalúlaıdtyń aıtýynsha, «muny barlyǵy da durys uǵynýy kerek, tipti halyqaralyq qoǵamdastyq ta oǵan túsinistikpen qaraǵany durys".

–Parlamentte halyqtyń daýysyn alyp,  el zańnamasyn bekitip otyrǵan partıalar da biryńǵaı bilim berý júıesine kóshý kerektigin talap etýde. Muny elimizde turatyn dıasporalar túsinýi tıis. Bilim tek qana eston tilinde berilýi kerek.–dedi prezıdent Kerstı Kalúlaıd.

Prezıdenttiń pikirine sensek, «eki tilde bilim berý eldi ekige bólip otyr. Sondyqtan barlyǵy da biryńǵaı bolǵany jón».

2010 jyly elde qabyldanǵan «Negizgi mektep pen gımnazıa týraly» zańǵa sáıkes, orys tilinde oqytylatyn gımnazıalar men mektep oqýshylarynyń quqy shektelip otyrǵan joq. Biraq eston prezıdentiniń aıtýyna qaraǵanda, bilim salasynda betburys jasaýdyń ýaqyty keldi.

Qazirgi ýaqytta Estonıada 80 -ge jýyq bilim ordasy bar. Olardyń birazynda sabaq orys tilinde oqytylady. Jalpy orys ultynyń ókilderi Tallınniń mańaıynda, sonymen qatar, eldiń soltústik-shyǵysyn meken etedi.

–Biz táýelsiz memleketpiz. Sondyqtan eston mádenıeti men rýhanıatyn, tilin –qorǵaý basty maqsatymyz.  Kez kelgen órkenıetti memleket osylaı óz saıasatyn júrgizedi. Oǵan bola «biz qysym kórip jatyrmyz» dep arandatýdyń keregi joq. Sondyqtan biryńǵaı bir tildi bilim berý júıesine kóshemiz. Oqýshylar ultyna, násiline qaramastan eston tilinde bilim alatyn bolady, –deıdi prezıdent Kerstı Kalúlaıd.

Bul ǵana emes, Baltyq jaǵalaýy elderinde, naqty aıtqanda Latvıada el halqynyń 40 paıyzy orys ultynyń ókilderi bolǵanyna qaramastan,  bilim berý latysh tilinde júrgizilip keledi.

Sonymen, Estonıa prezıdenti Kerstı Kalúlaıd te óz elinde orys tilinde bilim berýdi qalamaıtynyn aıtty.

...Al biz. Úsh tuǵyrly elmiz!