Astanada «Qazaq handyǵy. Altyn taq» fılminiń tusaýkeseri ótti, dep habarlaıdy Qamshy.kz aqparat agenttigi «Qazaqfılm» kınostýdıasynyń resmı saıtyna silteme jasap.

«Altyn taq» tarıhı týyndysy «Qazaq handyǵy» kınoserıalynyń ekinshi maýsymy. Onyń alǵashqy kórermenderi elimizdiń barlyq aımaqtarynan «Nur Otan» partıasynyń mereıtoılyq sezine kelgen delegattar boldy.

Tusaýkeser elordadaǵy «Qazaqstan» ortalyq konsert zalynda ótti. Tarıhı týyndynyń avtory - QR Prezıdenti Nursultan Nazarbaev. Tusaýkeser barysynda kınotýyndyǵa qatysqan shyǵarmashylyq quram men akterler qyzyl kilemmen júrip ótti. «Qazaq handyǵy» kınojobasy Elbasynyń bastamasy boıynsha qolǵa alyndy jáne halyqtyń rýhanı jańǵyrýyna baǵyttalǵan. Qazaqstan Respýblıkasynyń Prezıdenti Nursultan Nazarbaev jańa turpatty jańǵyrýdyń eń basty sharty ulttyq mádenıetti, ulttyq kodty saqtaı bilý ekendigin aıtty. Olar saqtalmasa, eshqandaı jańǵyrý bolmaıtyndyǵyn atap ótken bolatyn. Fılmde tarıh qana emes,  kóshpendi halyqtyń baı mádenıeti, onyń tynys-tirshiligi beınelengen. Sonymen qatar, Elbasynyń «Uly dalanyń jeti qyry» maqalasynda kóterilgen máseleler fılmde kórinis tapty», - dedi Mádenıet jáne sport mınıstri Arystanbek Muhamedıuly.

Fılm prokatqa bıylǵy naýryz aıynda shyǵady. Kóp serıaly kartınany QR Mádenıet jáne sport mınıstrliginiń tapsyrysy boıynsha «Centaurus Rustem Abdrashev production»  JSHS-niń qatysýymen Sh.Aımanov atyndaǵy «Qazaqfılm» kınostýdıasy túsirdi. Ekinshi maýsymnyń oqıǵa jelisi Jánibek pen Kereı handardyń Ábilqaıyr Shaıbanı urpaqtarymen Qazaq handyǵynyń Syǵanaqtaǵy taǵy úshin talasy aınalasynda órbıdi. Bul qazaq handyǵyndaǵy eń kúrdeli kezeńderiniń biri.

Fılmniń rejıseri - Qazaqstan Respýblıkasynyń Eńbek sińirgen qaıratkeri, kınorejısser, senarıst jáne sýretshi Rústem Ábdirash. Ol «Quraq kórpe», «Qaladan kelgen qyz», «Stalınge syılyq», Elbasy joly kınoepopeıasynyń: «Balalyq shaǵymnyń aspany», «Ot-ózen»,  «Temirtaý», «Tyǵyryqtan jol tapqan» jáne «Qazaq handyǵy. Almas qylysh» atty kınotýyndylardyń avtory. «Qazaq handyǵy» serıalynyń birinshi maýsymy otandastarymyzdyń tarıhqa degen qyzyǵýshylyǵyn oıatty. Shyǵarmashylyq toptyń atyna kóptegen alǵys hattar kelip tústi, ǵalamtor jáne áleýmettik jeliler arqyly jyly lebizder aldyq. Kóptegen pikirtalastar men syndar da boldy. Halyq tarapynan osy jobanyń jalǵasyn túsirse eken degen tilegin ańǵardyq. Bul biz úshin óte mańyzdy» dep atap ótti fılmniń rejıseri Rústem Ábdirash. 

10 serıadan turatyn tarıhı serıaldyń ekinshi maýsymynyń senarıin jazýǵa birinshi maýsymnyń avtorlary Tımýr Jaqsylyqov, Smaǵul Elýbaı, Rústem Ábdirash qatysty.  Tarıhı kınonyń túsirilimderi Almaty oblysynda mamyrdyń basynda bastalǵan edi. Keıinirek túsirilim toby Túrkistan oblysynda ornalasqan «Eltaı» aýyly mańyndaǵy «Iir sý» jaılaýyna aýysty. Túsirilim toby rejıser Rústem Ábdirashtiń bastaýymen Kereı men Jánibek handardyń turaǵyn  - tórelerdiń aýylyn jasap shyqty.  Shaıbanılar men Qazaq handyǵynyń úlken urys sahnasy da jaılaýda túsirilgen. Sonymen qatar, túsirilimder Qazaqstannyń tarıhı qalalary - Taraz jáne Túrkistanda ótti.

«Ekinshi maýsymnyń aty aıtyp turǵandaı «Qazaq handyǵy. Altyn taq». Qazaq handyǵyndaǵy eń bir kúrdeli kezeńderdiń biri. Jánibek pen Kereıdiń Ábilqaıyr Shaıbanı urpaqtarymen Qazaq handyǵynyń Syǵanaqtaǵy taǵy úshin taq talasy. Bul maýsymda taqty, Aqordanyń astanasy Syǵanaqty qaıtarý syndy mańyzdy oqıǵalardyń aınalasynda órbıdi.

Birinshi maýsymmen salystyrǵanda bul, árıne, áldeqaıda qyzyǵyraq, dınamıkasy jaǵynan jyldam. Ekshn kóp bolady. Kórermenge qyzyqty bolady degen oıdamyn», - dedi fılmniń bas prodúseri Arman Ásenov.

Esterińizge sala keteıik, Qazaq handyǵynyń qurylǵanyna 550 jyl tolýyna baılanysty jasalǵan serıaldyń birinshi maýsymynyń televızıalyq tusaýkeseri 2017 jyldyń naýryzynda ótken bolatyn.

Sondaı-aq, sol jyly qańtar aıynda «Almas qylysh» atty kınonusqasy jalpyulttyq prokatqa shyqty.

Qoıýshy-rejısseri: Rústem Ábdirash

Senarı avtorlary: Smaǵul Elýbaı, Tımýr Jaqsylyqov, Rústem Ábdirash

Qoıýshy sýretshi: Murat Karıpov

Qoıýshy operatorlary: Sapar Koıchýmanov, Aleksandr Plotnıkov

Kostúm jónindegi sýretshi: Ajar Áýbákirova

Bet árleýshi sýretshi: Sergeı Maýrın 

Bas prodúseri: Arman Ásenov

Kompozıtory: Ábilqaıyr Ábdirash

Redaktory: Erlan Tóleýtaı

Basty rólde: Qaırat Kemalov, Erkebulan Daıyrov, Dosqan Joljaqsynov, Iisbek Ábilmájınov, Aıan Ótepbergen, Meıirǵat Amangeldın, Nıazbek Shaısultanov, Bekbolat Tileýhan, Arman Qoja, Shuǵyla Saparǵalı, Madına Esmanova, Ǵazıza Tileýbaı, Qarlyǵash Muhamedjanova, İńkár Ábdirash, Farıza Eskermesova, Áshiler Súleımenov jáne basqalar.