Buzaqynyń jaýyzdyǵy munymen bitpegen. Ol qorǵansyz áıelderdi qol-aıaǵyn matap baılap, tepkilep, bireýiniń kózi men betin pyshaqpen jaraqattaǵan, dep habarlaıdy Qamshy.kz aqparat agenttigi Eýrazıa arnasynyń deregine súıenip.

Aıdyń kúni amanynda qarıalardyń záre-qutyn qashyrǵan qylmysker kim? Zardap shekkenderdiń jaǵdaıy qalaı?

72 jastaǵy Zylıha Qospaeva ábden úreılenip qalǵan. Bet-aýzy kógala qoıdaı. Úıdiń ishinde áli qan izderi jatyr. Zeınetker jaısyz jaǵdaı keshqurym bolǵanyn aıtady. Ózi ydys jýyp, al 65 jastaǵy sińlisi syrtqy esik jabyq pa, tekserýge shyqqan beti eken. Bir kezde úıge eńgezerdeı jigit kirip kelipti. Sodan keıin ne bolǵany emis-emis ǵana esinde. 

«Sińlimniń betin pyshaqpen osyp jibergen. Daladaı qan boldy. Pyshaqty qardyń ústine tastaı sala qashqan. Ekeýmizdi de tepkilep, uryp-soqty. Meniń tisim synǵan. Durys sóıleı almaımyn. "Mıllıondaryń bar, ber qane", dedi! Sosyn sińlim, "qaıdaǵy aqsha, biz zeınetkermiz, alatynymyz tıyn-teben" degen. Taǵy da urdy. Sosyn sómkedegi 1000 teńgeni berip edik, azsyndy, sińlim taǵy da 1000 teńgeni berdi», - deıdi qala turǵyny Zylıha Qospaeva.

Eki zeınetkerdi betinen, ishinen tepkilep, aqsha suraýyn doǵarmaǵan jigit qońyraý soǵýǵa oqtalǵan Zylıha apany baıqap qap, telefonnyń symyn úzip tastapty. Osy kezde zeınetker dalaǵa qashyp úlgerip, bar daýsymen aıqaılap kórshilerinen kómek suraǵan. Jedel járdem shaqyrǵan.
Zylıha Qospaeva men sińlisine kimniń shabýyl jasaǵany jumbaq kúıinde qalyp otyr. Alaıda zeınetkerdiń ózi "bar pále qarsy úıdegi kórshilerimnen keldi" dep qoımaıdy. "Burynnan maǵan qyryn qarap júr" dep ókpesin aıtty. Tipti, sol úıdiń bólmesin jalǵa alyp otyrǵan jigit bizdi uryp-soqqan dep senimdi aıtyp otyr. Biraq, qudaıy kórshileri "bul bizge jabylǵan jala" dedi. 

Polıseıler eki zeınetkerdiń kórshilerinen jaýap alynǵanyn aıtty. Alaıda, qaraqshylyq shabýyl jasaǵan kúdiktini áli tappaǵan. İzdestirip jatyr.

«Atalǵan derekke sáıkes, QR Qylmystyq kodeksnińi 192-baby, qaraqshylyq boıynsha tergeý júrgizilip, kúdiktini anyqtaý boıynsha qajetti sharalar qabyldanýda», dep málimdedi oblystyq polısıa departamenti baspasóz qyzmetiniń jetekshisi Erbolat Sarqulov.

Zylıha Qospaevanyń pyshaq jaraqatyn alǵan sińlisi aýrýhanada em qabyldap jatyr. Sol jaq kózi men bet súıegi zaqymdanǵan. Al Zylıha apaıdyń ózi aýrýhanaǵa jatýdan bas tartqan. Óıtkeni, bolǵan jaǵdaıdan keıin úı-jaıyn tastap kete almaıdy.

Usynǵan: Nazerke Labıhan