Kóńilsizsiń be? Eshnársege zaýqyń soqpaıdy ma? Aınaladaǵynyń bári de mazańdy alyp jiberdi me? Tózimiń taýsylyp bara ma? Úmitiń úzilip, saǵyń synǵandaı haldemisiń? Janyńnyń syryn uǵynǵandaı bolyp kim jáýdireı qarasa, sonyń ıyǵyna basyńdy qoıyp, egilip, jylaǵyń kele me? Eshnársege úlgertpeıtin ýaqytqa ashýlysyń ba? Kóp nárseni josparlap, biraq biri de oryndalmaı jatqandyqtan, bárine qoldy bir siltep, bárinen qashyp ketkiń kele me? Álde biraz ýaqytqa jer túbine baryp-qaıtqyń keletin shyǵar? Syılamaıtyn, bardy qadir tutpaıtyn, seni túsinýge de tyryspaıtyn, seniń bar-joǵyńa qyzyqpaıtyn, izdemeıtin, izdeýińdi qalamaıtyn adamdar sharshatty ma? Synap-synap, synyna shydasań, keremetteı syılyq usynar taǵdyrmen taıtalasýdan jalyqtyń ba?...
Álde júrekke jol tapqan baqyttan basyń aınalyp júr me? Jadyraı shyqqan kúnge kúle qarap, jelmen birge terbelip júrmisiń? Kóshede kezdesken ár janǵa jymıa qarap, ózińnen óziń mázsiń be? Josparlaryńnyń birazy ǵana oryndalsa da, sabyryń sandyq túbinde me? Renjitkenderge, renjitkisi kelgenderge ashýly emespisiń? Baryńdy, bárińdi tartyp alǵan adamdarǵa da ókpeli emespisiń? Eshkimdi de jek kórmeımisiń? Baryńdy qanaǵat tutyp, ár kúnnen tek jaqsylyq kútemisiń? «Úmitsiz – shaıtan ǵana» ekenine bek senimdi túrde, tek alǵa qadam attap kelemisiń?...
Jo-joq. Sen, sirá, jazda gúldeı jaınap, qustarmen birge saırap júrgen shyǵarsyń? Al, kúzde japyraqtarmen birge sarǵaıyp, jeldiń jotasyna minip, qalyqtap, kúz jańbyrymen qosylyp jylap júrsiń, ıá? Álde qatelestim be? Múmkin qysta appaq qardaı aq júregińmen kúlli álemge aq peıilińmen nurly shýaq syılaıtyn shyǵarsyń? Qystyń ulpa qarymen birge erip, aǵashtardyń tamyryna nár berer tamshy sý bolyp, sosyn aǵashtyń ón boıyna sińip, kóktemde búrshik bolyp jarylamysyń? Osylaısha, jańa ómirge qadam attap júr me ekensiń?..
Tyńdashy, meniń saǵan aıtar jańalyǵym bar!!! Qulaq asshy, sózime? Eger, eger... bilesiń be, eger osy atalǵandardyń bári seniń basyńnan ótken bolsa, ótip jatsa... demek, sen, sen, bilesiń be....(!) demek, SEN ÓMİR SÚRİP JATYRSYŃ! Quttyqtaımyn! Sen ómir súrip jatyrsyń! Sen BARSYŃ! Sen TİRİSİŃ! Sen, sen, ıá, ıá, sen! Sen myna jalǵanda, myna ómirde, jazbamdy oqyp otyrsań, demek, meniń ómirimde de barsyń! Bilesiń be, sol úshin de KÓP RAHMET, ekrannyń arǵy jaǵynda otyrǵan BEITANYS TANYSYM!
Maqpal Sembaı
