Venesýela bıligi elge jan-jaqtan kelip jatqan gýmanıtarlyq kómekterden bas tartyp jatyr. AQSH, Brazılıa, Kolýmbıadan kelgen júk kólikteri shekarada toqtatylǵan. Opozısıalyq lıder Hýana Gýaıdony qoldaıtyn AQSH bıligi 20 mln dollar kóleminde qarajat bólgen.

Alaıda, shekaradaǵy qaqtyǵystarǵa qaramastan, Venesýela barlyq kómekten bas tartyp jatqan joq. Madýro jaqynda ǵana Karakasqa jetkizilgen, 300 tonna kólemindegi kómek úshin Reseıge alǵys aıtty.

Memleket basshysy Madýro AQSH kómegi onyń bıligin qulatýǵa baǵyttalǵanyn aıtty. AQSH-tan tamaq, dári-dármek, gıgıenalyq zattar suraǵan Hýana Gýaıdo ózin aqpan aıynda Venesýelanyń ýaqytsha prezıdenti dep jarıalaǵan bolatyn.

Ótken aptada Nıkolas Madýro Reseı eli jóneltken 300 tonna tamaq, dári-dármek 20 aqpanda elge jetedi dep habarlaǵan.

Alaıda DDSU-men tyǵyz baılanystaǵy Panamerıkalyq densaýlyq saqtaý uıymy 21 aqpanda Venesýelaǵa Reseıden 7,5 tonna zat jetkizilgenin aıtty. Dál mundaı kómek 2018 jyldyń sáýirinde de jetkizilgen.

Dúnıejúzilik densaýlyq saqtaý uıymy ótken jyly 50 tonna shet eldik gýmanıtarlyq kómekti tekseristen ótkizgen edi.  Venesýeladaǵy uıymdar elde dári-dármek pen medısınalyq zattar tapshy deıdi. Venesýela farmasevtıkalyq federasıasy dári-dármektiń 85%-y joq ekenin málimdedi.

Birikken ulttar uıymynyń málimetine súıensek, Venesýelaǵa 2018 jyly 24 mln dollar kóleminde gýmanıtarlyq kómek kórsetilgen. Bunyń ishine BUU jınaǵan 9 mln dollar da kiredi. Osy jyly BUU arqyly Venesýela 15 mln dollar alǵan.

 Sonymen qatar 2018 jyly Eýropalyq komısıa Venesýeladaǵy eń iri donorlardyń biri boldy. Ol 2016 jyldan beri krızıske tap bolǵan elge gýmanıtarlyq kómek berýmen keledi. 

Eýropalyq odaq jergilikti halyqqa beriletin tamaq, sý, gıgıenalyq jáne sanıtarlyq zattarǵa qatysty proektpen aınalysady. Ótken jyly maýsym aıynda Eýropalyq odaq 35 mln eýro, jeltoqsan aıynda taǵy 20 mln eýro, al bıyl qosymsha taǵy 5 mln eýro qarajat bólgen.

Saltanat Shynádil