Kongo azamatshasy Monıka Kamýkendj Kamganza EKSPO-2017 kezinde Qazaqstanǵa kelip, qazaqtan sábı súıip, osynda qalý úshin baryn salyp jatyr. Naýryz aıynyń basynda afrıkalyq áıelge bosqyn mártebesin bere me, álde otanyna qaıtaryp jibere me – belgili bolady. Qazir áıel qyzy Blessıng-Mashamen birge Ana úıinde turady dep jazady Qamshy.kz aqparat agenttigi sputniknews.kz saıtynyń deregin negizge alyp. 

Jańa ómir

Elordalyq Analar úıinde Monıka men qyzynan basqa 16 ana men bala turady. Eki qabatty záýlim úıdiń turǵyndarynyń bári taǵdyr tálkegine ushyraǵan jandar. Biraq árqaısysy bul úıdi alty aı ǵana panalaı alady.

Mekemeniń óz tártibi bar eken. Tańǵy toǵyzda uıqydan turyp, tańǵy as ishedi, keıin analar balalarymen serýenge shyǵady, sodan soń túski as iship, balalardy uıyqtatady. Ári qaraı aqyl-oıdy damytatyn oıyndar oınatyp, saǵat 11-ge deıin keshki as iship, uıqyǵa jatady. Úı turǵyndary kezektesip as ázirleıdi, úı jınaıdy. Sonymen birge, analar men balalardy kún saıyn medbıkeler men psıhologtar baqylap otyrady eken.

Mamandar men halyqtyń qoldaýy bizdiń keıipkerimizge jaqsy kómektesken. Birinshi suhbattan beri tórt aı ótti. Monıka qatty ózgerip ketipti: uzyn, órilgen shashyn qıyp, artyq salmaqtan arylǵan. Eń bastysy, ol burynǵydaı qaıǵy-muńǵa berilip, kóz jasyn kóldetpeıdi.

"Buryn únemi kúızelip júretinmin, bárin oılap ýaıymdaıtynmyn. Qazir janashyr adamdardyń qamqorlyǵyn sezinip, jaman oıdan boıymdy aýlaq ustaımyn, Qazaqstanda qalýyma ruqsat beredi dep senemin", - deıdi Monıka.

Osy azǵantaı ýaqyt ishinde afrıkalyq áıel tilderdi de meńgerip qalypty. Qazir qazaqsha, oryssha jaqsy túsinedi, bilgeninshe jaýap beredi.

Kishkentaı Blessıngtiń alǵashqy sózi "Da" bolýy da tańǵalarlyq jaıt emes. Bóbek "Ne boldy, Masha?" dep surasa, kádimgideı ym-ıshara tanytyp, jaýap bergendeı bolady.

Kongolyq áıel qazaqstandyq kelinshekke aınaldy

Qazaqstanda jumys isteýge ruqsat joq bolsa da, Monıka qol qýsyryp otyrǵan joq. Qazaqstandyqtar arasynda keń taralǵan taǵam túrlerin ázirleýdi úırenipti. Ásirese ártúrli kóje men palaýdy dámdi pisiredi.

Qazir Monıka men Blessıngke qujattardy resimdeý úshin kómek kórsetilip jatyr. "Qorǵaý Astana" qory men adam quqyǵy búrosynyń zańgerleriniń arqasynda Blessıng-Masha týý týraly kýálik alypty. 16 jasynda Qazaqstan azamatynyń tólqujatyn jasata alady.

Biraq Monıkanyń qujattaryn jasaý qıynǵa soǵyp tur. İshki ister mınıstrligi bosqyn mártebesin berýden bas tartqan, qazir bul sheshimge túsirilgen shaǵym qaralyp jatyr. 8 naýryzdan keıin kongolyq áıeldiń taǵdyry sheshiledi. Taǵy bas tartylsa, Joǵary sotqa aryz bere alady.

Jas ananyń ańsaǵan armany

Afrıkalyq áıel qujattaryn resimdep, jumysqa shyǵýdy armandaıdy. Biraq endi merekelik sharalarda bı bılep, nápaqa tabýdy oılap júrgen joq. Monıka bolashaqta aspaz nemese bala kútýshi bolǵysy keledi.

Qazir Monıka men qyzy eń qajetti zattarǵa muqtaj. Áıeldiń tabys tabýǵa zańdy quqyǵy joq bolǵan soń, qaıyrymdy qazaqstandyqtar kıim-keshek, balanyń kútimine qajetti kerek-jaraqpen qamtamasyz etip otyr.

Monıka Kongodaǵy týystarymen araqatynasyn úzgen. Biraq tilshilerdiń arqasynda týystary bárin estip bilipti. Al sábıiniń ákesi bul oqıǵanyń BAQ-ta keń taralǵanyna qaramastan Monıkamen habarlaspaǵan.

Afrıkalyq áıel Qazaqstanǵa qalaı tap boldy

27 jastaǵy kongolyq qyz Astanaǵa EKSPO-2017 kezinde jumys isteýge kelgen, alaıda Qazaqstanda júrip-turýyna ruqsat beretin qujattardy jasatýdy qıyndyqqa tap bolady. Sóıtip júrgende, áıel qazaqtan sábı súıip, nárestesi ekeýiniń barar jer, basar taýy qalmaı, sharasyz kúıge túsken.

Janashyr adamdar Monıkanyń bosanýynyń aqysyn tólep, afrıkalyq áıel Blessıng esimdi qyzymen "Qorǵaý Astana" qorynyń qamqorlyǵynda bolady. 2019 jyldyń basynan beri ana men bala elordalyq Ana úıinde turyp jatyr.

Usynǵan: Ásel Bolatqyzy