Zeınetkerlik jasyn uzartý kimge tıimdi? Qarapaıym halyqqa ma, álde bılikke me? Álde Marchenko zeınetkerlik alystasa, áıelder qartaımaıdy dep oılaı ma?  Múmkin,áıeldiń zeınettik jasyn ulǵaıtý -bul maıly kresloda áli de otyra tursaq degen názik jandylardyń armanynan týyndaǵan ıdeıa bolar. Biraq, 63 jas ómir boıy aýyr ónerkisipte istep, zeınetke zaryǵyp júrgenderge ońaı emes qoı. Sóz Dáýren Qýatta. Áıel teńdigi týraly másele qazaq qoǵamynda áli jalǵasyn tabýda. Bólshevık-kommýnıster «qazan tóńkerisin» jasaǵannan beri qazaq áıeli arbaǵa da otyryp bastady, basynan aq jaýlyqty sypyryp ta tastady. «Raýshan komýnıs» beınesinde el basqarý isine de aralasyp keledi. Shahtaǵa da túsip jatyr. Temirkólikterdi tizgindep, erkekterdiń tiz kıimine deıin kıip úlgerdi. Osydan bolyp bizde qazir ne áıel, ne er deýge kelmeıtin birtúrli adamdar qaýymy qalyptasyp bitti. Keıingi 7-8 jyldyń aýqymynda genderlik saıasat dep saırap júrmiz. Endi mine, áıelderdiń zeınetke shyǵý jasyn erlermen teńestirý kerek desip elirýdemiz. Bul usynys eń aldymen Ulttyq bankimizdiń tóraǵasy Marchenko deıtin kisiniń aýzynan shyqqan-dy. «Qyryq kisi bir jaq, qyńyr kisi bir jaq» demekshi, únemi qyńyraıyp, qyryn tartyp júretin Marchenko myrza: «Bizdiń Ulttyq bank qyzmetkerleriniń 67 paıyzy áıelder. Bizde áıelderdiń ájethanasy erkekterdikinen 2 esege artyq» dep salǵan edi óz usynysyn ótkizý úshin. Marchenko shamasy, bankterde súrligip isteıtin jumysy bolmaǵandyqtan, súrmelenip qana otyratyn qyz-kelinshekter sıaqty qazaq áıelderiniń bári jaqsy aqsha, jaıly turmystyń ústinde dep oılaıtyn bolsa kerek. Áıtpese álgindeı usynysty aıta qoımas edi. Árıne, kásibin tereń meńgergen áıel-analar bizde jetip artylady. Solardyń qabilet qarymyn sarqa paıdalaný úshin zeınet jasyn 63-ke deıin uzartý qanshalyqty múmkin? Erteli kesh mekteptiń ý-shýynan qulaǵy tunatyn muǵalim áıel 63 jasqa deıin zeınet jasyn kútip júre alady ma? Densaýlyqqa qateri mol ónerkásip oryndarynda jumys isteıtin áıelder she?  Halqymyzdyń 43 paıyzy aýyldy jerlerde turady. Ondaǵy tirliktiń ońyp turǵany shamaly. Ýrbanızasıa mádenıeti qazaq aýyldaryn kúni búginge deıin tolyq qamtı almaı tur. Qaladaǵy qara bazarlarda alaqap súıertkenniń bári áıel.  Demek, biz áıelderdiń zeınet jasyn ulǵaıtýdan buryn Qazaqstan halqynyń  áleýmettik turmysyn Eýropalyq deńgeıge jetkizip alýǵa tıispiz. Damyǵan elderde, mysaly Ulybrıtanıada, Fransıada, Italıada áıelder zeınetke 60 jasynda shyǵady. Ózimiz kúnde úlgi tutyp, árbir qadamyna úńilip qarap otyratyn Reseıimizde erler tipti 60 jasynda, al, áıelder 55-56 jasynda zeınet jasyna ıek artady. Beınet túbi - zeınet. Sol zeınetke zaryqpaı jetken adamda arman bar ma? "31" arna