Jaqynda Túrkıa Respýblıkasy Syrtqy ister mınıstri Mavlút Chavýshoglý Antalıada Ýkraınanyń shyǵysyndaǵy janjaldar men Reseı jáne Batys elderi arasyndaǵy máselelerge qatysty málimdeme jasaǵan. Bul týraly AFP aqparattyq agenttigi habarlaıdy.
Túrkıa SİM-niń aıtýynsha, Reseı Federasıasynyń Ýkraınaǵa jáne ózge de post-keńestik memleketterge jasaǵan basqynshylyq áreketteri eshqandaı aqtaýǵa jatpaıdy. Ýkraınanyń terıtorıasynyń buzylýyna birden-bir kináli Reseı Federasıasy.
"Ankara resmı túrde Máskeý men Batys elderi arasyndaǵy qarama-qaıshylyqtardy retteýde konstrýktıvti ról oınaýǵa ár qashan daıyn. Biraq, Reseıdiń Ýkraınaǵa, onyń ishinde Qyrymǵa, Grýzıaǵa jáne ózge de kórshi memleketterge jasaǵan, jasap jatqan zulymdyǵyn, halyqaralyq kelisimderdi aıaqqa taptaǵanyn keshirýge bolmaıdy",-deıdi mınıstr Chavýshoglý.
Sondaı-aq Túrkıa SİM basshysy Qyrym tatarlarynyń reseı bıligi tarapynan repressıaǵa ushyraı bastaǵanyna alańdaýshylyq bildirip, tıisti sharalardy qabyldaıtynyn aıtqan. Chavýshoglýnyń aıtýynsha, túrik depýtattary grýppasy Qyrymǵa arnaıy baryp, qyrym tatarlarynyń jaǵdaıyn kózben baqylap kelgen. Túrkıa depýtattary delegasıasy bul jolǵy sapardyń qorytyndysyn shyǵarǵan kezde, rasynda qyrym tatarlarynyń quqyǵy resmı reseı bıligi tarapynan aıaqqa taptalyp jatqandyǵyn jetkizgen.
Sonymen qatar, Túrkıa dıplomattary jetekshisi Ýkraına janjaldaryna qatysty Batys elderi de birqatar kemshilikter jibergenin atap ótken.
"Batys óz kezeginde Ýkraınaǵa Eýropa men Reseı arasynda tańdaý jasaý múmkindigin bergendigi eń úlken kemshilik boldy",-deıdi Mevlút Chavýshoglý.
Al Túrkıa Prezıdenti Rejep Taıyp Erdoǵan Túrkıa Respýblıkasy Ýkraınany strategıalyq seriktes retinde eseptep, onyń terıtorıalyq tutastyǵyn (Qyrymmen birge) qoldaıtynyn aıtqan bolatyn. Ol tipti Ýkraına halqyna qoldaý retinde 50 mıllıon dollar bólý týraly málimdeme jasaǵan.
Túrkıa Prezıdenti, Qyrym anneksıasynan keıingi qyrym tararlarynyń jaǵdaıyna qatysty Reseı bıligin aýyr synǵa alǵan bolatyn.
"Biz qazir Qyrymdaǵy tatar baýyrlarymyzdyń jaǵdaıyn baqylap otyrmyz. Mine, bir jyldan asty. Qyrym zańsyz túrde Reseı quramyna endi. Jaǵdaı ózgerdi. Qyrym tatarlary Reseı bıligi tarapynan qysym kóre bastady. Biz muny kún tártibinen túsirmeıtinimizdi aıtqym keledi. Meıli, eki jaqty kelissózder arqyly nemese kez kelgen halyqaralyq platformada biz qyrym tatarlarynyń máselesin aldyǵa tarta beremiz",-degen Taıyp Erdoǵan myrza.
Nurgeldi Ábdiǵanıuly
