"Syndym. Bir kórgennen. Júrisin aıtsańshy. Anaý múltfılm keıipkerlerindeı... tamaq ıisine elitip, aýada qalyqtaıtyn... erdim de qoıdym sońynan. Eriksiz. Áldebir sıqyr aıaqtarymdy baǵyndyryp, tek alǵa, onyń sońynan bastap keledi. Onyń avtobýstan túskeni sol edi, aıaldamama áli biraz bar bolsa da, ózimniń qalaı túsip qalǵanymdy bilmeı qaldym. Tipti jol aqysyn tólep-tólemegenim esimde joq.
Tyq-tyq etken ókshesimen júregime biz qadap jatqandaı! Júrek shirkiniń shym-shym etip qoıady. Juparyn aıtsańshy! Pah, shirkin! Jańa týylǵan balanyń ıisinen beter! Tolqyndanyp kelgen qoıý qara shashtary bas súıegine jasyrynǵan aqylynyń qorǵany ispetti. Álbette, mundaı "ǵajaptyń" aqymaq bolýy múmkin emes qoı! Kúnge shaǵylysqan uzyn shashtary tipti de sulýlandyryp jibergendeı Ony. Qypsha belinen qysyp ustap, kóterip alyp, aınaldyryp-aınaldyryp, appaq mańdaıynan súıip alsa shirkinniń! Júzin áli kórmesem de, baltyrynyń túsinen aqquba qyz ekenin ańǵaryp kelemin. Birese alǵa, birese artqa laqtyryp kele jatqan qoldaryn aıtsańshy! Appaq qaýyrsyny úlpildegen aqqýdyń qanatyndaı! Súırikteı saýsaqtary myna meniń uıpa-tuıpa bop sál maılanǵan shashymnan salalap tarasa, shirkin... men uzynnan túsip, aıaqty aıqastyryp, basymdy onyń aldyna qoıyp, kók shópte jaıǵasa ketken kezde... Sol kezde kún shaǵylystyrǵan kózderimdi jypylyqtatyp, qolymmen kózimdi kólegeılegende, ol appaq qolymen meniń júzimdi kúnnen qyzǵanyp, jasyra qoıady. Sonda... sonda... men onyń móp-móldir janarymen janarymdy túıistirip, súısinip, oǵan tamsanyp qaraaa-ap jatam da qoıamyn... Túf, qıalǵa berilip men de bir!
Boıy menimen shamalas eken. Keıin balalarymyz da suńǵaq boıly, taldyrmash, appaq, súp-súıkimdi bolady-aý, shamasy. "Shyr" etken telefonyn sómkesinen alǵanynyń ózi bir... bir keremet sát dersiń! Sýretshiler osy sátti kórse, sózsiz álemdi tań qaldyryp, tamsandyrǵan ǵajap týyndy dúnıege keler edi! Al aqyn, jazýshylar kórse, ádebıette oıyp oryn alar, urpaqtan-urpaqqa qalar ǵajaıyp surýlyqtyń sımvoly ispetti keremet bir shyǵarma dúnıege keler edi-aý! Mundaı ǵajapty kórip, sońynan erip kele jatqan men de baqyttymyn dál osy shaq! Daýysyn aıtsańshy! Ár sózin baptap, baıyppen, arǵy bettiń sózin tyńdap sóılegen sózderin aıtsańshy! Ne aıtyp jatqanyn uqpasam da, sóılegeniniń ózi quddy áýen dersiń! Kúlkisin-aı, kúlkisin! Taý bulaǵynyń syńǵyry jerde qalar! Quddy kómeıinen laǵyl monshaqtar úzilip jatqandaı! Qulaqtyń quryshyn qandyryp, eriksiz ezýińe áldebir shattyq syılaıdy-aý!
Quıyp qoıǵandaı dene pishimin aıqyn kórsetip turǵan kelte kóılegi tipti de jarasyp tur! Dál osy Janǵa arnap tigilgendeı! Kóıleginiń túsi de eshbir túske uqsamaıdy! Men mundaı tús baryn bildim be deseńshi?! Ókshesin jerge tıgizbeı turǵan bıik túplıi ózine ǵana jarasatyn, ózinde ǵana bar, ózine ǵana laıyq sulýlyqtyń ózgelerden ústem ekenin, ózgelerden erek, dara ekeninen habar berip, ózine jarasymdy tákkaparlyqty ón boıyna jup etip turǵandaı! Osyǵan deıingi men kórgen sulýlyq ataýlynyń bárin tárk etip, dál qazir Ol "IÁ" dese, qalǵan ǵumyrymdy osy sulýlyqty tamsanýǵa arnap, sońǵy demim taýsylǵansha osy Jannyń kirpigimen birge oıanyp, birge jumylar edim! Demimen tynystap, júrek lúpilin sanar edim! Ádette aıtyla salatyn "IÁ" degen eki áriptiń júgi aýyrlap, tonnalap turǵany-aı! Tek sońynan erip kele jatqan myna men osyndaı ǵajap kúıge túsip, es-aqylymnan aıyrylsam, Qudaı aqy, júzbe-júz kórsem, tipti tilim baılanyp qalar, á?! Bul Ǵajap Jannyń júzin kórsem, júregim shydaı alar ma eken? Eshqashan júzin kórsetpeı, osylaı sońynan erip júre bersem de meıli maǵan... tek joǵaltyp almasam eken kóz ushynan... Shirkin, mendegi baryn alyp, tek osy Jandy maǵan syıǵa tartsa, bolmysymen, júregimen qosa...
E, men óstip sońynan erip qana kele jatqanymda, ózge bireý batyldyq tanytyp qoıar. Munym jaramas! Táýekel dep, jaıaý jolda qatarlasyp, júzin kórip, syryn bilip, keýdeden atylyp shyǵaıyn dep turǵan mynaý júrekti Júregimen tanystyraıyn... "- dep ishteı ózin jegideı jep, "Sulýdyń" sońynan erip, esi ketip ǵashyq bolyp kele jatqan jas jigit Ǵajap Janǵa qatarlasyp, kózine kózi túskeni sol edi, bireý tóbesinen shelektep muzdaı sý quıyp jibergendeı ón boıy dir etip, aıaqtary alǵa qaraı qalaı jyldam júgirip ketkenin baıqamaı qaldy...
Ózine birtúrli qarap, asyǵa-aptyǵyp alǵa qaraı oza «shaýyp» ketken jigitti túsinbegen 55-60 jas shamalas "Áje" ıyǵyn qıqań etkizip, telefonnyń ar jaǵyndaǵy jaǵy talmaǵan qurbysymen mánsiz áńgimesin jalǵastyra berdi...
Maqpal Sembaı
