Krakovta jaýyp tur qar qylaýlap, Appaq túske boıalmaq barlyq aýmaq. Bar sulýlyq Vısla ózeninde, Taranýda top aqqý jandy baýrap. Kórinisten tur kóńil óleń aýlap, Syr bermeıdi múlgigen kerenaý baq. Ot shashady músini aıdahardyń, Degendeıin júrińder menen aýlaq. Samarqaýlyq bizderge tanytpastan, Iba, izet boıyna qalyptasqan, - Keń júrekti poláktyń eki qyzy, Jol kórsetip keledi jalyqpastan. Jańa dostar salyp júr bar yntasyn, (Áli talaı eki qyz saǵyntasyń...) Bizdiń elge kelińder, aınalaıyn, Sol qurmettiń kórińder qarymtasyn. ...Tolqyp turmyz Vısla jaǵasynda, Nebir sulý qustardyń bári osynda. Jaýǵan aq qar, aqqýlar, eki qyzdyń, Baılanys bar uqqanǵa arasynda. Jalǵasyndaı jaıdary esti ananyń, Túsirmedi sylqymdar esh qabaǵyn. Eń ádemi sátterim jan terbetse, Eń áýeli senderdi eske alamyn.

Kóz baılaýǵa qamdandy keshki dala, Qaraqońyr túske endi eski qala. Jasandy sham kóshege sán bergenmen, Bar jaryǵy aspannyń óshti jańa. Jarqyraıdy qaıtadan tań atady, Qubylystar týady jańa taǵy. Atý úshin asyqqan Kún sıaqty, Dóńgelenip dúnıe bara atady... Keńge jaıdy qanatyn qala túni, Qansha jerge belgili baratyny... Meniń oıymdaǵydaı jyr jaza almas, Jıylsa da Torýnnyń bar aqyny. Qysqan kezde boıymdy dara shabyt, Toptan qashyp izdeımin ońashalyq. Jyldam jazyp almasam aýyramyn, Qyldan názik janyma jara salyp. Tulǵam jyrǵa tolǵanda, jýǵan nurǵa, Qyzyq bolmas saýyǵyń, dýmanyń da... Tańsyq emes Galıleı, Kopernık te, Farabı topyraǵynda týǵan ulǵa. «Qaıtyńdar dep bul jaqtan ómir kórip», Torýn bizge tur, mine, tórin berip. Tún óleńge, al ózim túnge sińip, Asqaq basyp kelemin kóńildenip.

Jaıt eken ǵoı ǵashyqtyq áste áýreli,

Sol sulýdy saǵyndym Máskeýdegi. Kóz aldymnan syrǵýda neler eles, Tebirentip tátti shaq jas keýdeni.   Ańsarymdy aýdyryp qarashyǵyń, Keltiretin kóńildiń jarasymyn,- Qalqam, qalaı kóterip júr ekensiń, Kelbetińe qadalǵan dala suǵyn.   Jyly ushyrap kózine baýraǵasyn, Muńdy etesiń talaıdyń saý balasyn. Symbatyńa ımanmen sýǵarylǵan, Bar álemniń nazaryn aýdarasyń.   Oıymdaǵy ózińsiń asyl úmit, Ardaqtysyn eter me ǵashyq umyt. Kórsetpeımin ázirshe seni eshkimge, Jurt kózinen júre tur jasyrynyp...   Qalqataıym jaralǵan izgi armannan, Júregimdi qaıteıin syzdar bolǵan. Sonyń bári ózińdi saǵynǵannan, Sonyń bári ózińdi qyzǵanǵannan.   Kýá eterdeı boıdy alar nazyńa erteń, Saǵynyshtyń shertýde sazyn ólkem... Mendik kúıdi júrsiń be sen de keship, Nárkes janar, naz úndi názik erkem.  

Jasaǵan qulyn Aıdy mertiktirme, Keledi aspan tósi bórtip túnde. Esime tústi qarǵam, Shaqta osynaý, Júr eken mensiz syryn shertip kimge?!   Juldyzy bórtip tóske urǵan aspan, Qus joly soqpaq pa edi qyrǵa qashqan. Kómkergen keremetti Kók kúmbezi, Ózińdeı ǵashyq edim jyrǵa bastan.   Basylmaı kóńilimniń eleńdesi, Kóshedi kókiregimde óleń kóshi. Kóliktiń kóshedegi jaryǵymen, Aǵashtyń bólmeme endi kóleńkesi.   Otyrmyn san oılarǵa berilip men, Ómirim ótip jatyr serilikpen. Esedi pende-ǵumyr shattyq izdep, Bir baqyt qaıdasyń dep meni kútken.   Bastaǵan aıaq-qoly jansyzdana, Tirilip, serpiledi qamsyz qala. Tóńirek boıaldy áne bozań nurǵa, Oıandy tirshilik te tań syzdana.   Bul da bir tabıǵattyń sazy-daǵy, Jarasqan jaz qylyqtyń nazyna áni. Túndegi bórtken dene asqynbastan, Aq kúnniń shýaǵymen jazylady.  

Aınaldyryp taýlardy baspaldaqqa, Shaqyrardaı sol álem dos bolmaqqa. Júrgenimmen jer basyp isim bolmaı, Nege eleńdeı beremin aspan jaqqa?!   Habar berip qalardaı bir shyndyqtan, Zeńgir Kókke qaraımyn tylsym buqqan. Jumbaǵy mol dúnıe jymyńdaıdy, Júrektegi beımaza dúrsildi uqqan.   Aıtatyndaı syrlaryn aqtaryp bar, İrkes- tirkes júzedi maqta bulttar. Aspan keıde ǵalamdy aqpen boıap, Qanatynan tógedi shattanyp qar.   Bala shaqta jetelep órge murat, Sermegenmen qulashty keńge biraq,- Shatyrlasa nazaǵaı shoshýshy edim, Ketetindeı qara aspan jerge qulap.   Jaryq berer sáýleli nurlanyp kún, Aı, juldyzyn sonan soń tur jaǵyp tún. Ot penen sham bulardyń kóshirmesi, Bári sende eken- aý shyn jaryqtyń.   Zańǵarlyqty pańdyqpen tuǵyr ettiń, Quıdy nóser...  biri me eń muńy kóptiń?! Aspan, nege jylaısyń aǵyl -tegil, Bola tura mekeni qudirettiń?   Kúmbirlegen keýdeńe saz ba sińgen, Úılesimiń barynda tozbas irgeń. Jaǵal- jaǵal osynaý tirshilikti, Tazalaıyn dediń be kóz jasyńmen?!...  

Túngi bulttar jaýynyn búrkidi de, Ker dalanyń shyq qondy kirpigine. Shoq gúlderdiń janary tur jáýdirep, Alyp ushqan sezimin irkidi ne?!   Tıyn kóz, tańǵy shyqtaı móldiregen, Mysaly, qarashyqtaı kól bir óleń. Móltildep túnniń jasy jerge sińer, Qylmastan qaǵyp túsken jeldi de eleń.   Jupar ısin ańqytyp jazdaǵy óńir, Ańqańdy ashyp salady sazǵa nebir. Móldir shyqtar bolmysyn saqtap óter, Mańdaıyna jazsa da az ǵana ómir.   Móldir oılar tizildi paraǵyma, Kóshirmesi dál onyń dala myna. Tańǵy shyqtar jymyńdar juldyzdardaı, Keńistikti syıdyryp janaryna!