Byltyr ǵalamtordy dúrliktirgen káris Psaıdyń «Gangam staılyna» eńbektegen baladan eńkeıgen qartqa deıin shoshańdap bılegeni áli umytyla qoıǵan joq. Tipti álemdik mádenıetke qubylys bolyp endi. Esersoqtar tobyn jınap alyp, ebedeısiz qımyl jasap bıleýdi ónerdiń «zamanaýı» bir túrine aınaldyryp berdi. Al bıyl, qańtar aıynan bastap sol «Gangam staılyndyń» izbasary ispetti «Harlem Shake» atty bı ǵalamtordy jaýlap, elikteýshi toptardyń bıleri álemdik jelide jańbyrdan keıingi sańyraýqulaqtaı qaptap shyqty. Bul «Harlem Shake» bıiniń negizgi «ereksheligi» tynysh otyrǵan bir top adamnyń ishindegi bireýi aıaq-qolyn ońdy-soldy sermep, bımen attas túsiniksiz áýenge bıleı bastaıdy. Artynsha mańaıynda otyrǵannyń barlyǵy álginiń qımylyn qaıtalap, bı bıleıdi. Tipti bı dep te aıtýǵa aýzyń barmaıdy. Tánin jalańashtap, ústi-basyn boıap, kózge oǵash kórinetin erotıkalyq qımyldar men adam kórmegen qylyqtardy keltirip bıleıdi. Quddy jyn-shaıtannyń ordasy ma dersiń?! Jáne mindetti túrde bı beınege túsirilip, ǵalamtorǵa jarıalanady. Bul úrdis ózgeniń qańsyǵyn tańsyq kóretin bizdiń eldiń jastaryn da aınalyp ótpedi. Joǵarǵy oqý ornynyń stýdentteri men oqýshylar «Harlem Shake»-ke jarysa bılep, ǵalamtor betin toltyryp jatyr. Sóıtip osyndaı oıynnan ot shyqty. Qaraǵandy memlekettik tehnıkalyq ýnıversıtetiniń bir top stýdenti oqý ǵımaratynyń ishinde bı bılep, oıran salǵan. Jastar ulttyq naqyshtaǵy stendterge de, elbasynyń portretin kózge de ilmeı, tipti jartylaı jalańashtana bılegen. Mundaı beıbereketsizdikti jazalaý maqsatynda oqý orny basshylyǵy bıdi uıymdastyrǵan birinshi kýrstyń eki stýdentin oqýdan shyǵarǵan. Árıne, jaza – oryndy. Alaıda jyr osymen bitse ıgi. Osy oqıǵanyń izin ala stýdentterge qatysty mundaı sheshimge qarsy shyqqan burynǵy depýtat Baqyt Syzdyqova álgi eki stýdentti qaıtarý úshin jyndy bıdi qaıta bıleýge shaqyrdy. Aıda aspannan shyǵarǵan Syzdyqova tek ózi ǵana emes, basqa depýtattardy da eki stýdenttiń jolynda ult pen uıatty qurban etip, haram bıdi bıleýge úndepti. Biraq basqa shendi-shekpendiler uıalǵan bolýy kerek, bul usynysty qoldaı qoımady. Esesine Syzdyqova hanym «kózsiz» batyrlyqqa baryp, 14 naýryz kúni Astanada Harlam Sheıkke ózi bılep berdi.
Syzdyqova: «Bizdiń petısıamyzǵa mınıstr Jumaǵulov nazar aýdarady degen úmittemin. Ol oqýdan shyǵarylǵan stýdentterdi qoldaýy tıis. Jáne JOO basshylyǵynan stýdentterdi arashalap alýy kerek», -deıdi. Onyń aıtýynsha, áli úmit bar, sebebi mınıstr depýtat hanymnyń úndeýlerin qalt jibermeı, mindetti túrde jaýap qatady eken. Qarǵa qarǵanyń kózin shuqymaıdy emes pe? Depýtattar da burynǵy áriptesteriniń qadamyna oń kózqaras bildirdi. Máselen, Komýnıs Vladıslav Kosarev oqý ornynyń jazasy orynsyz ekendigin alǵa tartyp,kinániń barlyǵyn oqý ordasyndaǵy tárbıeniń joqtyǵyna artsa, depýtat Ahmed Mýratovtyń pikirinshe, qoǵam qaıratkerleri azamattardy qorǵaýy tıis. Jáne stýdentterdiń oqý bólmesinde Harlem Shake bıleýleriniń esh sókettigi joq. Bul tek balalyq. Naqtyraq aıtqanda, kóktem barlyǵyna áser etip jatyr. Rasynda, kóktemniń «barlyǵyna» áser etip jatqany baıqalyp tur. Sonda bul qalaı bolǵany? Úlgi alar úlkenderimiz jastarǵa tálim berýdiń ornyna tártipsizdikke, oısyzdyqtyń aldyn alýdyń ornyna ospadarlyqqa, jón aıtýdyń ornyna júgensizdikke bastaǵany ma? Al siz ne deısiz, oqyrman?
Janıa ÁbdibekSýret zakon.kz saıtynan
Pikir qaldyrý