Parıjdegi qazaqtardyń Paris Kazakspor fýtbol klýby Qazaqstannyń Astana, Almaty, Qaraǵandy jáne Shymkent syndy iri tórt qalasynda bolyp, qazaqstandyq fýtbolshylarmen joldastyq kezdesýler ótkizbekshi. 7-19 maýsym aralyǵynda ótetin oıyndarǵa Parıj qazaq fýtbol klýbynyń sapyndaǵy 15 jigit daıyndalyp jatyr. 

Bul sporttyq uıymnyń negizin Eýropadaǵy eń úlken qazaq dıasporasy sanalatyn Fransıadaǵy qazaq azamattary 1986 jyly qalaǵan. Paris Kazakspor fýtbol klýby búginde Fransıa fýtbol federasıasynyń 7-lıgasynda óner kórsetip júr. Qandastarymyz «Parıj» jáne «Il-de-Frans» kýboktaryn jeńip alǵan. Qazirgi tańda komanda qatary keńeıip, oıynshylar sany 44-ke jetti.

Ótken jyly ǵana Golandıadan oralyp, Shymkenttiń «Qyran» fýtbol komandasyna qosylǵan Murat Ónel búginde Qazaqstandaǵy úzdik surmergenderdiń birine aınalǵany bárimizge málim. Ala dopty serik etip, qazaq namysyn shetelderde qorǵap júrgen aǵaıynnyń balasy osy jolǵy oraıdy da paıdalanyp, atajurtynda qalyp, qazaqstandyq fýtbol komandalarynyń abyroıyn asyrýǵa úles qosyp jatsa nur ústine nur bolary haq. Atap óterligi, bul ret Qaraǵandydaǵy «Nátıje» sút fabrıkasynyń bas dırektory Erlan Áshim men «Otyrar-Group» kompanıasynyń dırektory Ábdimájıt Syzdyqbekovtyń demeýshi bolýymen Parıj qazaq fýtbolshylary atajurtta tuńǵysh ret oıyn kórsetkeli otyr.

Maıgúl SULTAN