Aýyldaǵy toılardyń birindegi ájeler kúresiniń vıdeosy jelide pikirtalas týdyrdy dep habarlady 7 arna. Vıdeony kórgenderdiń birazy bulaı ájeleremizdiń bilek synasýy uıat degen pikirde bolsa, endi biri bul “qatyn kúres” degen ejelgi ulttyq sport túri dep jatyr. “Beldesýge er adam qalmap pa? Jeńgisi kelse apalarymyz urshyq ıirip jaryssyn. Uıat ári ersi, qyz-kelinge esh kórseter úlgi joq!”, – dep jazǵan pikir qaldyrýshylardyń biri. “Oǵash eshteńesi joq, bul dástúrli qoǵamda burynnan bolǵan “qatyn kúres”. Tek myna jerde kıimderi ońdy bolmaı qalypty. Ony san saqqa júgirtip,  qazaqtyń burynǵysynan habarlaryńnyń joqtyǵyn tanytpańdarshy. Qaıta qazirgi kezde sol kezdiń tanymy, ádebi, ımandylyǵy deńgeıinen kóp tómendep ketkenimizdi moıyndalyqshy”, – dep jazǵan ekinshisi. Kúrestiń bul túri HH ǵasyrda toı-tomalaqtarda jıi ótkizilgen eken. Jeńimpazdarǵa arnaıy júlde berip otyrǵan. Ol kezde dańqty palýan apalarymyz kóp bolǵan da shyǵar. Esterińizge salsaq, 2012 jyly Áz-Naýryz meıramynda elordalyq ájeler men atalar boz kilemde beldesip, jarys uıymdastyrǵan bolatyn. Elordanyń “Qazaq eli” monýmenti aldynda “qazaqsha kúresten” boz kilemge etek-jeńin túrip, ájelerimiz ben atalarymyz da shyqqanyn agenttikter habarlap ketken edi.