Túrkistan oblysy Saıram aýdanynda «Sherzad-1» sharýa qojalyǵy jumys istep keledi. 2000 jyly negizi qalanǵan qojalyq iri qara malyn ósirýmen aınalysady. Túrkistan oblysy ákiminiń baspasóz qyzmeti uıymdastyrǵan pres-týr barysynda jýrnalıser atalǵan sharýashylyq nysanynda bolyp, atqarylyp jatqan jumystarmen tanysty.

Búginde qojalyqtyń menshigindegi mal basy sany 120-dan asyp jyǵylady. Mekeme basshysy sharýashylyq aýqymyn taǵy da keńeıte túsýdi josparlap otyrǵanyn aıtady.

«Men bul sharýany eki sıyrmen bastaǵanmyn. Aldymen ósirip, semirtip bireýdi ekeý etý úshin jas tanashyqtarǵa aýystyrdym. Maldyń basy qurala túskennen keıin memlekettik baǵdarlamamen kásipkerlerdi qoldaý baǵyty boıynsha kómek aldym. Bul da sharýamnyń ilgerileýine úlken septigin tıgizdi. Mal basy sanyn arttyra túskim keledi. Biraq, tehnıka jetkiliksiz, endi memlekettik qoldaýdyń arqasynda osy qajettilikke qol jetkizip alýdy kózdep otyrmyn», – dedi Shýhrad Abdýkarımov.

Qazirgi tańda qojalyq sút óndirýdi de qolǵa alǵan. Kúnine 2 tonna sút óndirip, «FýdMasterge» ótkizip keledi. Munda 80 men 150 myń teńge aralyǵyndaǵy jalaqymen 7 adam turaqty jumyspen qamtylǵan.

Búginde bul kásipkerdiń atqaryp otyrǵan jumysy kópshilikke úlgi bolyp otyrǵanyn aıtady aýdandyq aýyl sharýashylyq bóliminiń mamandary. Máselen, Záýre Sansyzbaeva úıinde 5 sıyr baılap baǵyp otyr. Odan kún saıyn 70-80 lıtr sút alyp, dúkender men sút óńdeıtin sehtarǵa ótkizip keledi. Búginde sharýa kásibiniń aýqymyn keńeıtý maqsatynda Tólebı aýdanynan jer alyp, qora soǵyp mal basy sanyn kóbeıtýdi josparlap otyr.

Usynǵan: Gúlim Jaqan