Ýyldyryq shashar kezde sol balyq.
Qos janary tumandana tolǵanyp,
Pálenbaı kún jol júrip,
Ábden sharshap boldyryp,
Qulshyna, janyp ishten,
Jan júıesin syzdatqan saǵynyshpen
Urpaǵyna senimdi oryn tapqansha,
Eshqaıda qaıyrylmastan,
Bastapqy baǵytynan aıyrylmastan,
Kózinde tek analyq arman oınap,
Júzedi eken úmitin alǵa baılap.

Ol anyq sezinedi:
Tabıǵattyń tamasha kezeńinde
Sonaý ińkár Aqjaıyq ózeninde
Jyldaǵydaı sekirip oınamaıtynyn,
Jem izdep sharlamaıtynyn,
Janarynda jaz kórki jaınamaıtynyn,
Tereńge tepsine boılamaıtynyn.

Amal qaısy, bárin de kórý kerek,
Urpaǵy úshin oǵan da kóný kerek,
Ketalardyń taǵdyry qandaı qatal,
Ýyldyryq shashqan soń ólý kerek!

Bul balyq shynynda da dara batyr,
Áne, oǵan jaqyn tur zaman aqyr.
Sonyń bárin biledi ol,
Bile tura,
Ýyldyryq shashýǵa bara jatyr.

Qalsa bopty urpaǵy jalǵasy bop,
Jalǵasy bop, tirliktiń arnasy bop.
Ózi ólgen soń denesin shortan jesin,
Munda onyń ınedeı sharýasy joq...

Átteń, shirkin, músinshi bolsam-aý men,
Uzaq tún kirpik ilmeı tolǵanar em.
Urpaǵy úshin júregi jyrlap ótken,
Urpaǵy úshin ómirin qurban etken
Osyndaı alyptarǵa
Ǵajaıyp bir eskertkish ornatar em...

Ómir mynaý – tolǵan daý, tolǵan eges,
Urpaq joqta tarlanyń tarlan emes,
Armanyń arman emes.
Óıtkeni, urpaq taǵdyrynan mańyzdy
Bizge deıin eshteńe bolǵan emes,
Jáne bizden keıin de bolmaq emes!!!

Muhtar Shahanov