Qazaqstandyq kásibı boksshy amerıkandyq kishi Vıllı Monrony altynshy raýndta nokaýtqa jiberip, orta salmaqta sýperchempıondyq ataǵyn qorǵap qaldy. Bastapqydan qarsylasyn soqqynyń astyna alǵan Golovkın Monrony ekinshi raýndta eki márte sulatyp túsirip, nokdaýnǵa jiberdi. Úshinshi, tórtinshi raýndta amerıkalyq boksshy esin jıǵandaı bolyp qarsylasa bastady. Alaıda altynshy raýndta Golovkınniń aýyr soqqysynan keıin alańdaǵy tóreshi aıqasty toqtatty. Bul – 33 jastaǵy qazaqstandyq boksshynyń kásibı rıngtegi 33 kezdesýindegi kezekti jeńisi. Gennadıı sonyń 30-yn, qatarynan 20 shaıqasyn nokaýtpen aıaqtap, áıgili Taısonnyń rekordyn jańartty. AQSH-tyń Inglvýd qalasyndaǵy Golovkın men kishi Monronyń jekpe-jegin kórýge 12600 adam jınalǵan.