Óz-ózin sýretke túsirýge degen qushtarlyq saldarynan týyndaǵan qaıǵyly oqıǵa Rýmynıanyń Iassy qalasynda oryn aldy. Jergilikti BAQ-ta taraǵan aqparattarǵa sáıkes, selfıge qyzyqqan 18 jastaǵy Anna Ýrsý áserli sýretke túsemin dep tirideı órtenip ketti. «Rossııskaıa gazeta» basylymynyń habarlaýynsha, boıjetken qurbysymen birge poıyzdyń ústinde turǵan biregeı sýret túsirý úshin temirjol stansasyna barady. Poıyzdyń shatyryna shyǵa bererde qyzdardyń biriniń aıaǵy joǵary kerneýli toq symyna tıip ketedi. Saldarynan, 27 000 vólttyq toq soqqan qyz turǵan jerinde órtenip ketken. Toqtyń kerneýi onyń qurbysyna da tıip, ony poıyzdyń ústinen jerge laqtyryp jiberedi. Osy sátte poıyzdyń mańynan er azamat ótip bara jatqan. Oqıǵa kýágeri poıyzdyń ústine qarǵyp minip, zardap shekken qyzdyń órtengen kıimin sóndirmek bolady. Alaıda ol qyzdy qutqara almady. Denesiniń 50 paıyzyn kúıik shalǵan boıjetken aýrýhanada kóz jumdy. Onyń qurbysy da aýrýhanaǵa túsken, abyroı bolǵanda onyń ómirine esh qaýip tónip turǵan joq. Ókinishke qaraı, álemdi jaılaǵan selfımanıa saldarynan týyndaǵan jan túrshigerlik qaıǵyly oqıǵalar jıilep barady. Taıaýda Avstrıada Alpi taýyna kóterilgen brıtandyq oqýshy selfı jasaımyn dep, 500 metr bıiktikten qulap ketken.