Belgili boksshy Qanat Islam bıylǵy Naýryz meıramyn Astana halqymen birge qarsy aldy. AQSH-ta jattyǵyp júrgen sportshy elordaǵa arnaıy kelip, eldegi ózgeristerge qatysty bir aýyz pikirin bildirdi, dep habarlaıdy Qamshy.kz aqparat agenttigi Sputnik Qazaqstan saıtynyń deregin negizge alyp. 

Boksshynyń Qazaqstanda Naýryz meıramyn toılamaǵanyna úsh-tórt jyl bolyp qalǵan.

"Elordaǵa Elbasymyzdyń aty berilip, úlken tarıhı sátter bolyp jatyr eken. Elbasy mańyzdy sheshim qabyldap, barsha halyq pen álemniń kókeıindegi suraqty bir mezette sheshti. Osylaısha, ol kisi taǵy bir márte óziniń batyrlyǵyn, minezin kórsetti", - dedi Islam.

Sportshy Nursultan Nazarbaevtyń prezıdenttik ókilettigin toqtatatynyn úıde otyryp estigen.

"Shynyn aıtqanda, dúnıe toqtap qalǵandaı sezim boldy. Halyq ta, ózimiz de úırenip qaldyq qoı. Dese de, Allaǵa shúkir, jas býynnyń ósip kele jatqanyna, Elbasynyń solarǵa batasyn bergenine qýanyshtymyn", - dep aǵynan jaryldy boksshy.

Sonymen qatar, ol sharshy alańǵa qashan oralatynyn da aıtty.

"Astana kúnine úlken jekpe-jek josparlap otyrmyz. Jastar jylynda qazaqtyń on eki batyrynyń qurmetine jekpe-jekter uıymdastyramyz. Tarıhta qalǵan ata-babalardyń esimin jańǵyrtsaq, erteńgi kúni jas urpaq bizdiń de esimimizdi jańǵyrtady", - dedi Islam.

Aldaǵy jekpe-jektiń ótetin orny áli naqtylanbaǵan, biraq Almatyda bolyp qalýy ábden múmkin, dedi ol.

Usynǵan: Ásel Bolatqyzy