Aıdos Sarym áleýmettik jelidegi Facebook paraqshasynda kópbalaly analarmen jumys isteý týraly pikirimen bólisti. Bul týraly Qamshy.kz aqparat agenttigi habarlaıdy.

Osy kúnderi kópbalaly analar men otbasylar máselesimen biraz etene aralasyp, zertteýge týra keldi.  Keshe kúni-boıy analarmen kezdesip, qujattaryn qabyldadym.  Qabyldaýǵa kelgen júz ananyń qyryqtan astamymen sóılesip, barynsha kómek berýge tyrystym.  Shynyn aıtaıyn, buryn da az-maz qaıyrymdylyq, kómek sharalaryn jasadyq, qatystyq. Biraq kún saıyn bundaı jumysty atqarý úshin júrek pen nervi qajet eken. Bul jumysqa tek arnaıy daıyndyǵy, ishki talaby, muraty bar adamdar qatysyp, aralaspasa, qalǵany bekershilik bolady eken.  Jyldar boıy áleýmettik qorǵaý qyzmetkerleriniń de jumysy ońaı emes eken. San túrli minez, temperament, psıhologıa toǵysqan jerde salqynqandylyq saqtaý, daýys kótermeý, ursyspaý da qıynnyń-qıyny sıaqty bolyp kórindi. Bundaı jumys kez-kelgen adamdy tozdyryp, tasjúrek ete me dep qaldym. Ekiniń biri de: ıa ár adamǵa óz júregiń men janyńnyń bóligin beresiń, ıa tastaı qatqan robot bolasyń degen sóz.  Sondyqtan óz basym memorgandar men analardyń arasynda dáneker bolatyn, úlken jumys pen mindet júgin jeńildetetin uıymdardyń kóbeıgenin qalaımyn.  Ózgeni bilmeımin, keshe kelgennen jumysqa kirisip kettik. Tústeneıin deseń, kezektegi analardy qımaısyń. Eki-úsh ret temeki shegýge shyqqanyńdy qylmys sanap, qýystanady ekensiń.  Qysqasy, bir kúnde 46 anamen kezdesip, baǵyt berip, zańdy aıtyp, 39 adamnyń qujatyn qabyldap aldym. Búginde qorǵa myńnan astam adamnyń qujaty men talaptary tústi. Alǵashqy legine kómek kórsetilip jatyr. 

Aıdos Sarymnyń Facebook paraqshasynan

Usynǵan: Farıza Jomartqyzy