Dımash Qudaıbergenniń Máskeýdegi Kreml sahnasyndaǵy alǵashqy jeke konsertine 56 elden fanattar keldi. 

Dımashtyń Reseıdiń tórindegi alǵashqy konsertine ánshiniń fanattary úsh saǵat buryn jınala bastady. Olar qoldaryna "Dımash" dep jazylǵan plakattaryn, qushaq-qushaq gúlderin ustap kelgen. Kóńil-kúı kóterińki, olar konserttiń joǵary deńgeıde ótetinine senimdi.

"Ótken jyly jeltoqsanda Máskeýde Dımashtyń konserti ótetinin estigen ýaqyttan bastap daıyndala bastadyq. Bul biz úshin óte erekshe oqıǵa. 17 jeltoqsanda bıletter satylymǵa shyqqan kezde 20 mınýttyń ishinde fanattar zaldyń ortasyndaǵy jaqsy oryndardy alyp qoıdy. Keıin Dımashtyń ekinshi konserti ótetini belgili boldy. Biz Dımashqa qoldaý kórsetý úshin eki konsertine de baramyz. Únemi janynda bolýǵa tyrysamyz, áýejaıdan ózin de, otbasyn da qarsy alyp, qanshalyqty jaqsy kóretinimizdi kórsetip júrmiz", - dedi Nora esimdi Eýrazıa fan-klýbynyń Máskeýdegi bólimshesiniń múshesi.

Máskeýlik Antonına Smırnova da Eýrazıa fan-klýbynyń múshesi. Aıtýynsha, Dımashtan asyp túsetin ánshi qazir álemde joq.

"Áýeli stýdent qyzym Dımashtyń ónerine tánti bolyp, keıin maǵan ınternetten kórsetti. Ol Máskeýdegi fan-klýbty taýyp alyp, ekeýmiz bir jyldan beri múshemiz. Dımash ándi keremet aıtady, mundaı daýysty buryn-sońdy estigen emespin. Ol án shyrqaǵan kezde denemiz túrshigip, kózimizge jas úıiriledi", - deıdi ol.

Al Olga Terekof jubaıymen Germanıanyń Fýlda qalasynan arnaıy Dımashtyń konsertine kelgen. Buǵan deıin Londondaǵy konsertinde bolyp, umytylmas áser alǵan eken.  

"Keshe álemniń túkpir-túkpirinen konsertke kelgen fanattar kezdestik. Alty saǵatqa sozylǵan keshke ata-ájesi, anasy, dostary keldi. Birge án shyrqap, baıqaýlar ótkizip, tamasha kezdesý ótkizdik. Dımashtyń shyǵarmashylyǵymen bir jyl buryn tanystym. Sodan beri úzbeı baqylap kelemin. Qazaqstanda áli bolǵan joqpyn, bıyl Astanada ótetin konsertine baryp qalýym múmkin", - dedi Dımashtyń tyńdarmany.

Máskeýlik Svetlana Gýrskaıa Dımash Qudaıbergenniń Kremldegi konsertinen keremet áser alatynyna senimdi. Aıtýynsha, jas ánshiniń eshkimge uqsamaıtyn qaıtalanbas daýysy kez kelgen adamdy tebirentpeı qoımaıdy.  

 "Men Dımashty tyńdaǵan saıyn mádenı "shok" alamyn, orasan keń daýyspen aıta otyryp, osynsha emosıa kórsetetini tańǵaldyrmaı qoımaıdy. Vokaldyq múmkindigi zor, biraq másele tek onyń teńdessiz daýysy men ándi sheber oryndaýynda ǵana emes, ol shynaıy. Mýzykadaǵy emosıany ózi arqyly ótkizip, ándi búkil jan-dúnıesimen, júregimen oryndaıdy. Keremet! Keıbir ánshiler sekildi sahnaǵa shyǵyp, áıteýir birdeme aıtyp, aqshasyn alýdy oılamaıdy. Osy qasıeti úshin jaqsy kóremiz", - deıdi ol.

Al Máskeý turǵyny Marýsá Svetlova Dımashtyń sıqyrly daýysyn alǵash ret estigende qandaı sezimde bolǵanyn aıtyp berdi.

"Dımashty alǵash ret YouTube-taǵy rolıkten kórip, aýzym ashylyp qaldy. Jap-jas jigittiń osynsha oktavada án aıtýy múmkin emesteı kórindi. Odan keıin ınternettegi barlyq konsertterdi, baıqaýlardy kórip shyqtym. Al birneshe aıdan keıin ápkem Máskeýde Dımashtyń jeke konserti ótetinin aıtqan kezde qýanyshymda shek bolmady. Daryndy, tanymal, máskeýlik juldyzdy elıtadan emes, ol juldyzdardyń bárin kóleńkesinde qaldyrdy", - dedi ol.

Qytaıdan Dımashtyń 300-den astam fanaty Máskeýge at terletip kelipti.

"Dımash qaı elde óner kórsetpesin, biz ylǵı qoldaý kórsetýge daıynbyz. Biz ony "I am singer" jobasyndaǵy alǵashqy áninen beri jaqsy kóremiz, mıllıondaǵan "dears" onyń ónerine tánti. Biz úshin onyń mýzykasy, onyń ánderi óte mańyzdy. Dımashtyń Máskeýdegi eki konserti de keremet ótetinin bilemiz", - dedi qytaılyq fanattar.

Dımashqa qoldaý kórsetýge ánshi, kompozıtor Ulyqpan Joldasov otbasymen arnaıy kelgen.  

"Buryn tek Qytaıda konsert beredi dep bári aıtýshy edi. Qudaıǵa shúkir, Eýropany sharlady. Amerıkaǵa baryp shýlatyp qaıtty. Ol jaqta da konserti bolady dep kútilýde. Máskeýdegi konserti qutty bolsyn deımiz. Budan keıin Astanadaǵy "Arnaý" konsertin kútemiz. Búgingi keshi jaqsy ótetinine júz paıyz senimdimin", - dedi ánshi.

Aıta ketsek, 19 naýryzda Dımash Qudaıbergenniń túrli elden kelgen fanattary ánshini Máskeý áýejaıynan zor qoshemetpen qarsy aldy. Reseılikter orys halqynyń dástúrimen qadirli qonaǵyna nan men tuzdan aýyz tıgizdi. Dımashtyń ónerine tánti jurt qoltańbasyn alyp, sýretke túsip, syılyqtaryn tartý etip, máre-sáre bolǵan edi. Kelesi kúni ánshiniń tyńdarmandary onyń otbasyn da áýejaıdan qushaq jaıa qarsy aldy.

Dımash Qudaıbergenniń Máskeýdegi D-Dynasty konserti Igor Krýtoıdyń prodúserlik ortalyǵynyń qoldaýymen ótti. Buǵan deıin konserttiń úzilissiz úsh saǵat bolatyny aıtylǵan edi.

Ótken jyldyń jeltoqsan aıynda ánshi Kreml saraıynyń sahnasynda óner kórsetetinin habarlaǵan edi. Áýeli Dımash bir konsert berýi tıis edi, biraq bıletter jyldam satylyp ketip, reseılik taraptyń ótinishimen qazaqstandyq ánshi kelesi kúni de sahnaǵa shyǵýǵa kelisim beredi.

 Usynǵan: Farıza Jomartqyzy