Qazaqstannyń Túrkıadaǵy elshiligi ulystyń uly kúni Ankarada úı tigip, Naýryz merekesin sán-saltanatymen atap ótti. Bul týraly Qamshy.kz aqparat agenttigi habarlaıdy.
Elshi Abzal Saparbekuly, Túrkıa Respýblıkasy Prezıdentiniń Bas keńesshileri Ialchyn Topchý jáne Ihsan Shener, TÚRKSOI Bas hatshysynyń orynbasary Fyrat Pýrtash, Túrkıa Uly Ulttyq Májilisiniń eks-spıkeri Hıkmet Chetın, TUUM depýtaty, Premer-mınıstrdiń burynǵy orynbasary Iyldyrym Tuǵryl Túrkesh jáne basqa memleket, qoǵam qaıratkerleri, Ankaradaǵy dıplomatıalyq korpýs basshylary, Ystambul, Manısa, Nıǵde, Sakarıadan kelgen qazaq dıasporasy, Túrkıada bilim alyp jatqan stýdentter men BAQ ókilderi qatysqan sharada qazaqtyń salt-dástúrleri men ádet-ǵuryptary, ulttyq kıimderi men as máziri kópshilik nazaryna usynyldy.
Jańarý men jańǵyrýdyń qutty bastaýyna Qydyr ata aq batasyn berip, sahnalyq kórsetilim «Betashar», «Tusaýkeser» rásimderine ulasty. Konserttik baǵdarlama barysynda Ámre, «Jigitter» toby, Qazaq ulttyq óner ýnıversıteti «Astana» fólklorlyq ansambli, «Otaý» bı toby jáne TÚRKSOI talanttary óner kórsetip, resmı qabyldaýmen jalǵasty.
Usynǵan: Farıza Jomartqyzy
