Búgin Qazaqstan Respýblıkasynyń Prezıdenti Qasym-Jomart Toqaev jumys saparynda Túrkistan oblysynyń atqarýshy organ basshylarymen, ardagerler jáne zıaly qaýym ókilderimen kezdesti. Qazaqstan Prezıdenti aldymen jurtshylyqty merekemen quttyqtady dep habarlaıdy Qamshy.kz aqparat agenttigi.
«Eń aldymen, barshańyzdy Ulystyń uly kúnimen shyn júrekten quttyqtaımyn! Bıylǵy 19 naýryzda, kóktemniń shýaqty kúninde bárimiz elimizdegi tarıhı oqıǵaǵa kýá boldyq. Memleket bolashaǵyn oılaǵan Tuńǵysh Prezıdentimiz mańyzdy sheshim qabyldady. Osyndaı syndarly kezeńde Elbasyn jáne meni qoldaǵan barsha halqyma rızashylyǵymdy bildiremin.
Biz bıliktiń aýysýyn turaqty jaǵdaıda júzege asyramyz. Meniń negizgi maqsatym – Elbasynyń strategıalyq baǵytynyń sabaqtastyǵyn qamtamasyz etý», – degen Qasym-Jomart Toqaev Túrkistan oblysy men onyń ortalyǵy Túrkistan qalasyn damytý baǵytyndaǵy jumystar jalǵasatynyn jetkizdi.
«Búgin men túrki dúnıesiniń rýhanı astanasy – Túrkistanǵa taǵzym etý úshin arnaıy keldim. Túrkistan – elimizdiń altyn besigi, mádenıetimiz ben rýhanıatymyzdyń sımvoly jáne búkil halqymyzdyń boıtumary. Bul qasıetti jerdi kózimizdiń qarashyǵyndaı saqtap, damytýymyz kerek. Elbasynyń bul qalaǵa erekshe mártebe berý týraly sheshimi kezdeısoq emes. Túrkistandy túletip, órkendetý máselesi árdaıym Tuńǵysh Prezıdentimizdiń nazarynda bolady. Ejelgi Túrkistannyń jańǵyrýy jáne jańarýy damý jolymyzdyń durystyǵyn kórsetedi. Prezıdent retindegi alǵashqy saparymnyń Túrkistannan bastalǵany men úshin asa mańyzdy», – dedi Qasym-Jomart Toqaev.
Memleket basshysy osy jıynda qoǵamdaǵy negizgi máselererge toqtalyp, sabaqtastyq, ádilettilik, ilgerileý ustanymdary boıynsha jumys isteıtinin aıtty.
«Úkimettiń, mınıstrlerdiń, barlyq deńgeıdegi ákimderdiń, polısıanyń, prokýratýranyń, sottardyń basty maqsaty – azamattardyń quqyǵyn qorǵaý. Zańnan joǵary eshnárse bolmaýy kerek. Ortalyq jáne jergilikti organdardyń basshylaryna qatysty oryndy shaǵym túsken jaǵdaıda olardyń bári jazalanatyn bolady. Sondyqtan basshylar halyqpen tyǵyz qarym-qatynasta jumys isteýi qajet. Jylyna bir ret uıymdastyrylatyn esep berý kezdesýleri – kózboıaýshylyq. Halyqpen kún saıyn birge bolyp, qoıan-qoltyq jumys isteýi kerek. Jemqorlyqpen kúres kúsheıe túsedi» degen Prezıdent jastardy qoldaý, jańa jumys oryndaryn ashý, «Rýhanı jańǵyrý» baǵdarlamasy boıynsha jumys isteý jóninde tapsyrma berdi. Sonymen birge búdjet qarjysyn únemdeý, ol úshin ımıjdik is-sharalar men jıyndardy azaıtý kerektigin eskertti.
Túrkistan oblysynyń ákimi Ómirzaq Shókeev «Qurmetti Qasym-Jomart Kemeluly! Óńirimizge arnaıy kelip, tynys-tirshiligimen tanysqanyńyzǵa alǵysymyz zor. Túrkistanǵa degen qurmetińiz ben qamqorlyǵyńyzǵa rahmet. El senimin aqtaý, jáne búgingi májiliste Siz aıtqan bastamalar men tapsyrmalar boıynsha naqty jumystar atqaratyn bolamyz», – dedi.
Jıynda «Alash» ádebı syılyǵynyń ıegeri, tanymal jazýshy Marhabat Baıǵut Prezıdenttiń alǵashqy jumys saparyn Túrkistannan bastaǵanyna rızashylyǵyn bildirip, Elbasymyz ókilettiligin tapsyrarda aıryqsha saıası mádenıet pen parasatty sheshim qabyldaǵanyn atap ótti. Sonymen birge Túrkistan qalalyq ardagerler keńesiniń tóraǵasy Jarqynbek Qulbaıymbetov pen aıtysker-aqyn Marjan Esjanova da júrekjardy lebizderin aıtyp, Memleket basshysynyń Qazaqstannyń jáne Túrkistannyń damýyna úles qosatynyna senetinderin jetkizdi.
Usynǵan: Farıza Jomartqyzy
