«Samuryq-Qazyna» UÁQ» AQ Basqarma tóraǵasy Axmetjan Esimov Memleket basshysy Qasym-Jomart Toqaevpen kezdesti. Kezdesý barysynda Qazaqstan Prezıdentine Qor qyzmetiniń 2018 jylǵy qorytyndysy men aldaǵy ýaqytqa josparlar týraly aqparat berildi dep habarlaıdy Qamshy.kz aqparat agenttigi.

Axmetjan Esimov Qor jumysynyń oń nátıjelerin atap ótti. Qor quramyna kiretin kompanıalar oń qarjy kórsetkishterin kórsetti. Qordyń iri segiz kompanıasynyń tabysy 2017 jylmen salystyrǵanda ulǵaıdy. Osylaısha, Qordyń kompanıalar tobynyń negizgi qyzmetinen túsetin tabysy 8,5 trln. teńgeden asty jáne 2018 jyly 35 %- ǵa artty.

Taza paıda 1,1 trln. teńgeni qurady, bul 2017 jylǵa qaraǵanda eki ese kóp. Dıvıdend kólemi eki eseden astamǵa artyp, 296 mlrd. teńgeni qurady. Qor kompanıalar tobynyń qaryz deńgeıi 1 trıllıon teńgege qysqardy. Syrtqy qaryz 4 mlrd. AQSH dollaryna qysqardy.

Memlekettik búdjetke aýdarymdardyń kólemi 1,1 trln. teńgeni qurady, bul 2017 jylmen salystyrǵanda 40% artyq. Oń óndiristik qarjylyq nátıjeler Qorǵa densaýlyq saqtaý, salaýatty ómir salty, medısına, bilim berý jáne qaıyrymdylyq salasyndaǵy áleýmettik baǵdarlamalardy júzege asyrýdy jalǵastyrýǵa jáne keńeıtýge múmkindik berdi.

Ahmetjan Esimov Memleket basshysyna aǵymdaǵy jylǵa Qordyń negizgi josparlary men mindetteri týraly baıandady. Osylaısha, Qordyń josparlary: «Qazaqtelekom» AQ men «Eır Astana» aksıalaryn IPO-ǵa shyǵarý, «Saryarqa» gaz qubyrynyń qurylysy, «Fly Arystan» avıa kompanıasyn iske qosý men bolashaq urpaq Qoryn qurýǵa baǵyttalǵan.

Usynǵan: Farıza Jomartqyzy