Astanalyq polıseıler mas kúıinde kólik aıdap ketken kúdiktini ustady. Bul týraly Qamshy.kz aqparat agenttigi Polısıa departamentiniń saıtyna silteme jasaı otyryp habarlaıdy.

24 naýryzda saǵat 22.00 shamasynda jedel basqarý ortalyǵynan «Infiniti FX35» markaly kóliktiń júrgizýshisi jol erejesin óreskel buzyp, mas kúıinde bolý múmkin degen habarlama kelip tústi. 
Avtokólikti toqtatý kezinde atalǵan kólikitń júrgizýshisi polıseılerdiń zańdy talaptaryn oryndamaı, jyldamdyqty asyra paıdalanyp, jol qozǵalysynyń basqa da qatysýshylarynyń ómiri men densaýlyǵyna qaýip tóndirgen. 

Qorǵaljyn tas joly men Aıagóz kóshesiniń qıylysynda polısıa qyzmetkerleri kólikti májbúrlep toqtatýdy sheshti. Tek polısıa avtoekıpajymen soqtyǵysqan avtokólik toqtatyldy. Onyń nátıjesinde úsh polısıa qyzmetkeri dene jaraqatymen aýrýhanaǵa jetkizildi. "Infiniti FX35" avtokóliginiń júrgizýshisi dárigerlerdiń tekserisinen keıin (keýde qýysynyń soǵylýy) Saryarqa aýdanynyń polısıa bólimine jetkizildi.

Jergilikti turǵynǵa tıesili TQS aýmaǵynan avtokólikti aıdap áketken kúdikti tehnıkalyq qyzmet kórsetý stansıasynyń 35 jastaǵy qyzmetkeri bolyp tabylady. Medısınalyq kýálandyrý aktisine sáıkes, júrgizýshi mas kúıinde bolǵan. Atalǵan fakti boıynsha QR QK 200-baby ("aıdap ketý") boıynsha sotqa deıingi tergeý júrgizilýde. Ustalǵan azamat ýaqytsha ustaý ızolátoryna qamaldy.

Usynǵan: Farıza Jomartqyzy