Jastar jylynyń saltanatty ashylý rásiminde Aısholpan Nurǵaıypqyzy Nur-Sultan men basqa qalalarda búrkitshiler mektebiniń ashylǵanyn armandaıtynyn aıtqan edi, dep jazady Qamshy.kz aqparat agenttigi  Sputnik Qazaqstan saıtynyń deregine súıenip.

Aqparat jáne qoǵamdyq damý mınıstrligi jastar jyly aıasynda respýblıka óńirlerinde búrkitshiler ortalyǵyn ashýdy josparlap otyr.

"Elimizdiń aımaqtarynda búrkitshiler ortalyǵyn ashýǵa baılanysty sharalar qabyldanady. Asqar Uzaqbaıuly (premer-mınıstr – Sputnik), esińizde bolar, jastar jylynyń saltanatty ashylý rásiminde qazaqtyń atyn álemge tanytyp júrgen Aısholpan esimdi búrkitshi qyz ortalyq ashýdy usynǵan edi", - dedi aqparat jáne qoǵamdyq damý mınıstri Dáýren Abaev jastar jylyn ótkizý jónindegi jol kartasy qaralǵan úkimet otyrysynda.

Onyń aıtýynsha, vedomstvo jattyǵý ortalyqtaryn ashyp, túrli deńgeıdegi jarystar ótkizip qana qoımaı, mádenıet jáne sport mınıstrligimen birlesip jumys júrgizýdi josparlap otyr.

"Osylaısha, ultymyzdyń kóne ónerin Qazaqstandaǵy etnotýrızmniń mańyzdy ári ajyramas bólshegine aınaldyrý kózdelip otyr", - dedi mınıstr. 
Eske sala ketsek, bıyl qańtar aıynda Qazaqstannyń tuńǵysh prezıdenti – Elbasy Nursultan Nazarbaev jastarmen kezdesip, olardyń usynys-tilekterin tyńdaǵan bolatyn.

Sol kezde Mońǵolıadan kelgen búrkitshi qyz Aısholpan Nurǵaıypqyzy Nazarbaevqa óz armany týraly aıtqan edi.

"Astanada jáne basqa qalalarda qazaqtyń salt-dástúrin oqyp úıretetin ortalyqtar, ásirese, sonyń ishinde búrkitshiler mektebi ashylsa degen armanym bar", — degen bolatyn búrkitshi qyz.

Sonymen qatar, ol Elbasyny Mońǵolıaǵa qonaqqa shaqyrǵan edi.

Usynǵan: Nazerke Labıhan