Elorda áýejaıy as ishýde talǵampaz jolaýshylarǵa aıyryqsha kóńil bólýde. Qazirgi kezde dámdi as ishýdi qalaıtyndarǵa arnalǵan birneshe meıramhana, kafeler men asqanalar bar. Kofe dámin unatatyn qonaqtar úshin "Marrone Rosso" esigin aıqara ashty.
Nursultan Nazarbaev Halyqaralyq áýejaıy Basqarma tóraǵasy Rádilbek Ádımolda qoǵamdyq tamaqtaný oryndary ashylǵan kezde jolaýshylardyń barlyq sanattarynyń qajettilikterin eskerý kerek ekenin atap aıtty.
«Halyqaralyq tájirıbege súıensek, áýejaıda jolaýshylar restorandar men kafelerge ushardan buryn barady. Árıne, ushý qatań túrde retteledi jáne tamaqtanýǵa ýaqyt az qalady. Sondyqtan, meıramhanalar nemese kafeler jolaýshylarǵa tez jáne sapaly qyzmet kórsetýi kerek. Osy sebepti Marrone Rosso sıaqty sapa standarttaryna ıe brendterdi shaqyramyz», - dedi.
Rádilbek Ádımolda sondaı-aq, halyqaralyq áýejaı termınalynda birneshe qoǵamdyq tamaqtaný orny bar ekenin jáne olardyń baǵa saıasaty astanalyq mekemelerden aıtarlyqtaı aıyrmashylyǵy joq ekenin atap ótti. Jańa kofehananyń máziri ıtalıalyq, shyǵys elderi jáne eýropa asqanalary taǵamdarynan turady. Jolaýshylarǵa yńǵaıly bolýy úshin táýlik boıy jumys isteıdi.
«Marrone Rosso jaı ǵana kofehana emes, bizde meıramhana jabdyqtary bar – tańǵy as, túski as jáne keshki asty da usynamyz. Ári biz 24 saǵat jumys isteımiz. Ushaqtar táýlik boıy ushady, al halyqaralyq reısterdiń kóbi tún kezinde bolǵandyqtan, biz qonaqtardyń úmitin aqtaýǵa tyrysamyz. Osynda jolaýshylar aǵymy úlken, sondyqtan ýaqyt tártibin saqtaý kerek. Bul da áýejaı kofehanasynyń aıryqsha ereksheligi»,- dedi ashylýy kezinde aksıoner Medet Tólegenov.
Jańa tamaqtaný oryny halyqaralyq termınaldyń úshinshi qabatynda ornalasqan jáne 70 adamǵa arnalǵan. Eske sala keteıik, Aroma Group / Marrone Rosso ǵalamdyq jelisiniń Izraıl, AQSH, Kanada, Ýkraına jáne Qazaqstan tárizdi elderde 150 kofehanasy bar.
