«Almaty» telearnasy 2019 jyldyń 11 sáýirinen bastap «Ákimmen ashyq áńgime» dep atalatyn jańa telejobany júzege asyrady. Baǵdarlama ár eptanyń beısenbisinde keshki saǵat 19:30-da tikeleı efırden kórsetiledi. Hronometraj – 30 mınýt.
Joba aıasynda Almatydaǵy aýdandardyń ákimderi ár apta saıyn kezegimen turǵyndardyń saýalyna jaýap beredi. Baǵdarlamanyń alǵashqy qonaǵy – Alataý aýdanynyń ákimi Shahmerden Ryspaev.
Osylaısha, ár aptanyń beısenbi kúnderi ár aýdannyń basshysy tikeleı efırde halyqty mazalaǵan máselelerge qatysty óz jaýabyn aıtady. 8 aýdannyń ákimderi ár 2 aı saıyn telejobanyń qonaǵy bolmaq.
Ákimge suraq qoıýdyń birneshe joly bar.
Telearnanyń resmı saıtyna kirip (www.almaty.tv), «Ákimmen ashyq áńgime» aıdaryn tańdańyz. Saýalyńyzdy osynda jazyp qaldyrasyz. Saıt oqyrmandary eń úzdik suraqtarǵa daýys beredi. Eń kóp daýys jınaǵan 5 suraq tikeleı efır kezinde ákimge joldanady. Al, qalǵan saýaldar ákimdikke joldanyp, 10 jumys kúni ishinde barlyǵyna jaýap beriledi.
Sondaı-aq, saýaldy tikeleı efır kezinde WhatsApp messendjerine: +7 777 046 33 33 jáne stýdıa telefonyna 8(727) 334 00 24 habarlasý arqyly da qoıýǵa bolady.
Turǵyn úı komýnaldy sharýashylyǵy jáne jol problemalary, áleýmettik máseleler jáne turǵyndardy mazalaǵan ózge de suraqtardyń jaýabyn tikeleı efırde ákimnen suraımyz. Suraq berýshige tek bir ǵana talap bar: ol kótergen másele naqty sol ákim basqaratyn aýdanǵa qatysty bolýy tıis. Demek, 11 sáýirge deıin Alataý aýdanynyń turǵyndary mańyzdy problemalaryn telearnaǵa joldaı alady.
Aıta keteıik, bılik pen halyq arasyndaǵy baılanysty nyǵaıtýdy Memleket basshysy Qasym-Jomart Toqaev tapsyrǵan bolatyn. «Almaty» telearnasynyń jańa jobasy osy tapsyrmany oryndaýǵa baǵyttalyp otyr.
