Keshe áleýmettik jelide óskemendik balaqaıdyń túsirgen beınejazbasy jarıalanǵan edi. Dosjan esimdi bala úıiniń aýlasyndaǵy balalar alańynyń kúıin aıtyp, bıliktegilerge nazyn bildirgen. Sol balaqaımen búgin qala ákimi Jaqsylyq Omar kezdesti dep habarlaıdy Qamshy.kz aqparat agenttigi altaynews.kz saıtynyń deregin negizge alyp. 

Shahar basshysy Dosjan Dýlatulyna belsendi azamattyq pozısıa tanytqany úshin alǵys bildirip, onyń áreketi qalanyń eresek turǵyndary úshin úlgi bolatynyn aıtyp ótti.

— Qazir qalada myńdaǵan aýla bar. Olardyń kóbine 40 jyldaı ýaqyt jóndeý júrgizilmegen. Máseleni keshendi sheshý úshin oblys ákimi Danıal Ahmetovtyń bastamasymen «Meniń aýlam» baǵdarlamasy júzege asyrylýda. PIK ótinish bergen barlyq aýla búdjet esebinen tolyqtaı jóndeletin bolady. Ókinishke oraı, dál osy aýla ótken jyly ótinishti durys bermegen, sonyń saldarynan aýla jóndeletinderdiń tizilimine kirmeı qalǵan, - dedi Jaqsylyq Omar.

Mamandardyń aıtýynsha, mekeme baǵdarlama aıasynda aýlany jóndeýge ótinish jasaǵan. Biraq qujattar durys ázirlenbegendikten, ótinish qabyldanbady. PIK-tiń jumysy qanaǵattandyrmaıtynyn turǵyndar da rastap otyr. Al kooperatıvtiń tóraǵasy bul kezdesýge kelmeı qoıǵan eken.

Qala ákimi turǵyn úı jaǵdaıyn saqtaý men jaqsartý úshin turǵyndardyń belsendi qatysýy qajet ekenin eskertti. Sebebi PIK qyzmetin turǵyndardyń ózderi ǵana baqylaı alady.

Al Dosjannyń aıtqan nazyna keler bolsaq, Jaqsylyq Omar 2019 jyly jóndelýge tıis aýlalardyń tizimi bekitilip qoıǵanyn aıtty. Alaıda balanyń kóńilin qaldyrmaı, belsendiligine qoldaý kórsetý úshin qala búdjetinen únemdelgen qarajat esebine aýlany jóndetýge ýáde etti.

Usynǵan: Ásel Bolatqyzy