Bir emes, alty kelinshekti «súıem» dep aldap kelgen alfons jigit izdestirilip jatyr. Birin nesıege kirgizip, ekinshisine bala týǵyzyp, úshinshisiniń jıǵan-tergenin alyp ketken. Taqyrǵa otyrǵan kelinshekter ımanyndaı senip júrgen azamatynyń bala-shaǵasy bar ekenin tek polıseılerden esitip meń zeń kúıde. Azamattyq nekeden onyń bes áıelden týǵan alty balasy jan-jaqta. Al, bir erkek úshin túksiz qalǵan analar Ramıl Baıramovty jer-kókten izdep tappaı júr. Bul týraly Qamshy.kz aqparat agenttigi Eýrazıa birinshi arnasyna silteme jasap habarlaıdy. 

Iýlıa Nıkolenko azamattyq nekedegi kúıeýimen úsh jyl buryn áleýmettik jelide tanysqan. "Ajyrasqanmyn, balam bar, kómektesip turamyn" degen jigitke aldanyp qalǵanyn aıtady. Tym qamqorlyq tanytqanyna esi aýyp, birge turýǵa kelisken. Bir ul taýyp ta bergen. İshi-baýyryna kirip, ábden seniminen shyqqan soń, óz basyndaǵy problemalaryn aıta bastady deıdi. Sheshem aýyryp jatyr, hali múshkil dep qomaqty qarajat surapty. Al,  kelinshek bolsa qolynan kelgen kómegin aıamaǵan.  

"Shamamen 500 myń teńge aldy menen. Taǵy aǵamnyń kóligin bólip tóleımin dep satyp alǵan. Sol boıy ne kólik, ne aqshasy joq. Úsh jyl boldy qashyp júr. Men týǵandarymnyń aldynda qara bet bolyp qaldym", - deıdi adanǵan kelinshektiń biri Iýlıa Nıkolenko.

Qara bet bolǵan tek Iýlıa Nıkolenko ǵana emes. Qulaı súıdim degen sózine qulaǵan taǵy bes kelinshek bar. Bárine bala týǵyzyp, aqshalaryn alǵan soń izin sýytqan. Aldanǵan áıelder bir-birin áleýmettik jeli arqyly tapqan. Birine Amırmin, ekinshisine Samırmin dep ótirikti úıip-tókken. Tipti, biri Shymkenttiń turǵyny. Anel Orazbaeva da kózin mahabbatpen baılaǵan azamatqa ápergen nesıesin tólep, bir ulyn qushaqtap qalǵan. 

"Qyzdardy izdegen men. Qazir alty kelinshekpiz. Onyń 2017 jyly eki balasy eki áıelden, 2018 jyly taǵy eki áıelden eki balasy týyldy. Bárimizge aıtyp kelgen birinshi jarynan 8-9 jastaǵy eki balasy bar", - deıdi aldanǵa kelinshektiń biri Anel Orazbaeva.

Sonda er azamattyń bes áıelden alty balasy bar. Sábılerin qushaqtap qalǵan kelinshekter buryn bir-birine kúndes bolsa, endi muńdas. Sebebi, bólise almaı júrgen súıiktilerin izdeýge kirisken. Ákelik mindetin mindetteý úshin emes, nesıelerin tólep, kólikterin qaıtarý. Al Amır, Samır dep ózin san esimmen ataǵan «Don Jýan» osy. Shyn aty - Ramıl Baıramov eken. 

"Alty birdeı kelinshek jer-kókten izdegen Ramıl Baıramovtyń sheshesi Almatynyń qaq ortasyndaǵy osy úıde turady. Biraq, anasy bizge jaýap bermek túgili esigin de ashpady. Aıtýynsha, ulynyń zańdy nekede eki balasy bar. Solarmen birge turady. Al, joldan qosylǵan kelinderinyń birin de tanymaıdy eken". 

Biraq, aldanǵan kelinshekter eks-enesimen tanysqanyn, aralasqanyn aıtady. Tipti, qońyraý shalyp, otbasyndaǵy aýyr jaǵdaılarymen bólisetin bolǵan. Qazir oblystyq polısıa departamentine bes áıelden aryz túsken.

«Qazirgi tańda QR QK 190 babyna ıaǵnı alaıaqtyq faktisi boıynsha sotqa deıingi tergeý amaldary júrip jatyr. Sonymen qatar úsh aryzdy bir óndiriske biriktirý qarastyrýda. Sonymen qatar shymkent qalasynda da bul azamatqa qatysty aryz túskeni anyqtaldy», - dep málimdedi Almaty oblystyq polısıa departamenti baspasóz qyzmetiniń resmı ókili Serik Úpıev.

Sezimniń jeteginde ketken áıelder eks-kúıeýiniń túrin basqalary jattap alsa deıdi. Óıtkeni, ózderi qusap bótenniń nesıesin tólep, jalǵyzbasty ana atanǵandaryn qalamaıdy.

Usynǵan: Nazerke Labıhan