Energetıka mınıstri Qanat Bozymbaev AES salý týraly sheshim mindetti túrde qoǵamdyq tyńdaýlardan keıin qabyldanatynyn aıtty, dep habarlaıdy Qamshy.kz aqparat agenttigi Sputnik Qazaqstannyń deregine súıenip.

"Qazaqstanda atom elektr stansıasyn salý týraly áli eshqandaı sheshim joq ekenin aıtqym keledi. Biz bul máseleni áli zerttep jatyrmyz", - dedi Bozymbaev úkimet kýlýarynda.

Mınıstr elimizde AES salý máselesiniń talqylanyp kele jatqanyna 5-7 jyl bolǵanyn atap ótti. Aıtýynsha, 2030 jylǵa qaraı Qazaqstanda elektr energıasynyń tapshylyǵy baıqalady. Sebebi jyl saıyn elektr qýatyn tutyný artyp kele jatqan kórinedi.

"Sondyqtan qalaı bolǵanda da, bizge qandaı da bir qýattylyq salý qajet bolady. Eger úkimet AES salý týraly sheshim qabyldasa, ol jarıaly túrde, tıisti konsýltasıalar men qoǵamdyq tyńdaý arqyly ótedi", - dep sendirdi mınıstr.

Bozymbaev elimizde gaz stansıalary, gıdrostansıa salý josparlanyp otyrǵanyn aıtty.

Eske sala ketsek, Máskeýde Qazaqstan men Reseı prezıdentteriniń kezdesýinde Vladımır Pýtın Qazaqstanda atom elektr stansıasyn salýdy usynǵan edi. 
Osydan keıin, energetıka mınıstriniń orynbasary Maǵzum Myrzaǵalıev atom elektr stansıasy Almaty oblysynyń Úlken aýmaǵynda salynýy múmkin ekenin aıtqan bolatyn.

Usynǵan: Nazerke Labıhan