Búgin Memleket basshysy Qasym-Jomart Toqaev saǵat 13:00-de qazaqsandyqtarǵa úndeý jarıalaıdy. Al úndeý jasaıtynyn jarıalamas buryn prezıdent Aqordada Nur Otan partıasy tóraǵasynyń birinshi orynbasary Máýlen Áshimbaevty, "Aq jol" demokratıalyq partıasynyń tóraǵasy Azat Perýashevti, Qazaqstan komýnıstik halyq partıasy ortalyq komıtetiniń hatshysy Aıqyn Qońyrovty, "Aýyl" halyqtyq-demokratıalyq patrıottyq partıasynyń tóraǵasy Álı Bektaevty qabyldaǵan.
"Kezdesý barysynda qoǵamdyq-saıası kún tártibindegi ózekti máseleler talqylandy", - delingen Aqordanyń resmı saıtynda.
Toqaevtyń arnaıy úndeýin halyq saılaýǵa baılanysty boljap otyr. "Qazaqstanda merziminen buryn prezıdenttik saılaý ótýi múmkin" dep shýlasty.
Konstıtýsıaǵa sáıkes, Qazaqstanda prezıdenttik saılaý 2020 jyldyń aıaǵynda ótýi tıis. Alaıda 2019 jyly aqpannyń 4-inde Qazaqstan prezıdenti Nursultan Nazarbaev Konstıtýsıalyq keńesten Konstıtýsıadaǵy «prezıdent ókiletiniń toqtaýy týraly 42-baby 3-tarmaǵyn túsindirýdi» suraǵan. Sodan beri áleýmettik jeli qoldanýshylary merziminen buryn saılaý ótedi dep boljaı bastady. Biraq Nazarbaev erteńinde-aq qazaqstandyqtarǵa arnaıy málimdeme jasady. Onda halyqtyń beker ábigerge túspeýin, ýaqytynan buryn saılaýdyń bolmaıtynyn eskertken.
Al Qazaqstanda 30 jylǵa jýyq bılik qurǵan Nazarbaev 19 naýryzda kenetten prezıdent qyzmetinen ketetinin málimdedi. Ol málimdemesinde saılaý ótkenshe Qasym-Jomart Toqaev prezıdent bolatynyn aıtqan.
Toqaev 20 naýryzda ant berip, qyzmetine kiristi. Al Toqaevtyń ornyna Nursultan Nazarbaevtyń úlken qyzy Darıǵa Nazarbaev senat spıkeri bolyp taǵaıyndalǵan.
Aıta keteıik, 8-9 sáýir kúnderi prezıdent Atyraýdaǵy birqatar nysandardy aralaýy tıis edi. Alaıda sapary keıinge, ıaǵnı 11-12 sáýirge shegerilgen. Al keshe "Kók-Jaılaý" jobasyn ýaqytsha jabý týraly usynys aıtyp, nátıjesinde Almaty qalasynyń ákimi Baýyrjan Baıbek jobanyń keıinge qaldyrylatynyn málimdedi.
Endi mine Prezıdenttik taqqa otyrǵanyna bir aı tolmaı jatyp, Toqaev úndeý jarıalamaq. Osyǵan baılanysty birneshe sarapshyǵa qońyraý shalyp kórdik, alaıda mardymdy jaýap ala almadyq. Bizdińshe, bul tikeleı saılaýǵa qatysty bolýy múmkin...
