Ataýly áleýmettik kómekti taǵaıyndaýda birizdilik joq. Almaty oblysy Uzynaǵash aýylyndaǵy kópbalaly analar osylaı dep shaǵymdanyp otyr. Aıtýlarynsha, komısıa úıdiń ishindegi jıhazdy da esepke alypty. Tipti keıbiriniń úıindegi kilemi men teledıdaryn da sanaǵan. Alaıda, jergilikti bılik muny joqqa shyǵardy dep habarlaıdy Qamshy.kz aqparat agenttigi KTK arnasynyń deregin negizge ala otyryp.
Almaty oblysynda ataýly kómekti alýǵa qujat ótkizgen analar narazylyq bildirdi. Jambyl aýdany, Uzynaǵash aýylyndaǵy jurt tańnan beri ákimdik mańyn toraýyldap júr. Aıtýlarynsha, otbasy tabysyn esepteý barysynda keıbiriniń úıindegi kilem men teledıdardy esepke alǵan. Endi biriniń baspanasyz ekenine qaramaǵan. Iaǵnı, tabysty esepteýde birizdilik joq. Otbasynyń jaǵdaıyn osylaı anyqtaý aqylǵa qonymsyz dep ashynady.
Almagúl Muratova, Uzynaǵash aýylynyń turǵyny: - Televızor, shkaf, dıvan bolsa berilmeıdi deıdi. Sonda biz eki kilemniń ústinde otyrýymyz kerek pe? Tipti gaz, sý ótkizilmegen bolýy kerek deıdi. Al Úkimet tek jalaqyǵa qarap beriledi dedi. Durys pa?
Zemfıra Aqylbaeva, Uzynaǵash aýylynyń turǵyny: - Maǵan «Sen baısyń» járdemaqy nege kerek deıdi? Meniń úıim joq. Men enemmen birge turamyn. Kúıeýimde mashına bar. 1 jyl boldy memlekettik jumysqa turdy. 50 myń alady jalaqy, men 10 500 teńge alam. Sony 5 balaǵa jetkize ala ma?
2 sáýirden beri qujat qabyldaıtyn jerde maman az, - deıdi. Qarjylaı kómekti alýǵa ótinish bergennen keıin, arnaıy qurylǵan komısıa sol otbasyny tekserýi tıis. Osylaısha materıaldyq hattama toltyrylyp, sonyń qorytyndysyna sáıkes járdemaqy taǵaıyndalady eken.
Saltanat Shaıdildaeva, Uzynaǵash aýylynyń turǵyny: - Eki áıeldiń artynan 100 adam júr. Ol adamdardy aparyp úıińdi kórsetý kerek ekensiń. Ol tekseredi eken. Qazir túski asqa ketti. Endi qaı ýaqytta keletinderin bilmeımin.
Jaýaptylar túski úziliske ketkende jurt ashýyn qyzmet kórsetken jalǵyz mamanǵa tókti. Túski astan oralǵan ákimniń orynbasary tıisti mamandar bólinetinin aıtyp, eshkim eskerýsiz qalmaıdy dep sendirdi.
Damıra Naýryzbaeva, Uzynaǵash aýyldyq okrýgi ákiminiń orynbasary: - Búginnen bastap 5 adam bólinip jatyr. Ár úıge kiredi. Qajetti bolsa barlyǵy alady.
Ákimdik mamandaryna jumyspen qamtý ortalyǵy da kómektesedi. Árqaısy kóshe-kósheni aralap, ataýly kómekke shyn muqtajdardyń ara-jigin ajyratyp, anyqtaýy tıis. 21 myń teńgege úmittilerdiń biri - Aınur Atakıeva. Buryn memleketten jármedaqy alǵan emes. Bizdiń túsirilim toby komısıaǵa erip turmysy nashar otbasynyń tabysyn eseptep qaıtty. 16 sharshy metrlik lashyqty 3 adam panalaıdy. Iesine aı saıyn 15 myń tóleıdi. Otbasynyń kirisi - 42 myń teńge.
Aınur Atakıeva, jalǵyzbasty ana: - Balalarymnyń aqshasyn shyǵaryp berse eken deımin. Jetpeıdi meniń tabysym.
Komısıa múshesi jalǵyzbasty ananyń turmysymen tanysyp, kórgenin hattamaǵa tizip shyqty.
Araı Stamqulova, Uzynaǵash aýyldyq okrýgi ákimi apparatynyń bas mamany: - Turmys jaǵdaıyńyzdy kórdik. Sizge áleýmettik járdemaqy taǵaıyndalady. Bizge kelip qujattaryńyzdy jınasańyz bolady.
Ákimdiktegilerdiń aıtýynsha, 1 sáýirden bastap taǵaıyndalatyn járdemaqyny alý úshin ár otbasy qujat ótkizgen soń komısıa músheleri arnaıy baryp tabysyn tekseredi. Tipti qorasyndaǵy maly da esepke alynady eken. Sondyqtan eshkim tasada qalmas úshin árqaısyn jiti tekseremiz jáne oǵan ýaqyt kerek deıdi.
Usynǵan: Farıza Jomartqyzy
