Kúni keshe áleýmettik jelilerden belgili saıasatker, birqatar saılaýǵa túsken azamattardyń janynda júrgen Ámirjan Qosanov tikeleı efırge shyǵyp, jeli qoldanýshylarmen pikirlesti.
Bir saǵat boıy júrgizilgen tikeleı efırde saıasatker birqatar máselelerdi tarqata aıtty.
Alǵashqy kezekte aıtylǵan másele – opozısıa músheleri men opozısıalyq partıalar, qoǵamdyq qozǵalystardyń saılaýǵa qatysýdan bas tartýy. El arasynda, óz aralarynda osyndaı qaýeset baryn tilge tıek etken saıasatker múddeles azamattardy birigýge, buryn-sońdy oryn alǵan keleńsizdikterdi, renishterdi, tipti, satqyndyqtardy keshirýge shaqyrdy.
"Eger biz birikpesek, saılaýǵa túspesek, onda Nazarbaev ýaǵyndaǵy ishki júıe qaıta ornap, bas bermeı ketedi. Bizdiń bar múmkindigimiz osy saılaýda. Sondyqtan, arazdyqty, alaýyzdyqty ysyryp qoıyp, birigeıik", - dedi Ámirjan Qosanov.
Saıasatkerdiń ekinshi kótergen máselesi – saılaýaldy úgit-nasıhat kezeńi týraly.
"Ózderińiz bilesizder, Qazaqstanda on myńnan astam saılaý ýchaskesi bar. Ol jerdegi qyzmettiń barlyǵyn atqaratyn muǵalimder, dárigerler jáne t.b. Biz sol kezeńdi duys baqylap, daýysymyzdyń urlanýyna jol bermeýimiz kerek", - dep jalǵastyrdy ol.
Ámirjan Qosanov "Jańa Qazaqstan" forýmynyń belgili bir sebeptermen tirkelmegeni týraly, sol sebepti olar úmitker usyna almaıtyndyǵy týraly aıtty. Sondaı-aq, JSDP partıasynyń múshelerine, Jarmahan Tuıaqbaıǵa birqatar sálem joldaǵanyn tilge tıek etip, ol taraptan eshqandaı qozǵalys baıqalmaǵanyn jasyrmady.
"Maǵan birqatar qoǵamdyq qozǵalystardan usynys tústi. Eger olardyń atynan úmitker bolyp, saılaýǵa tússem, opozısıa músheleri men opozısıalyq toptardyń birligine, ózara araqatynasymyzǵa salqynym tıip kete me dep alańdaımyn", - deıdi saıasatker.
"Boıkot jarıalaý" týraly...
Tikeleı efır barysynda tutynýshylar suraqtaryna jaýap berip otyrǵan Ámirjan Qosanov birqatar azamattardyń "las saılaýǵa tumsyq tyqpaı-aq qoısańdarshy" degen usynystaryna boıkot jarıalaýdyń baǵyttaryn túsindirip berdi.
"Boıkot jarıalaýdyń eki túri bar. Biri – belsendi boıkot, ıaǵnı, ashyq qarsylyq bildire otyryp, bas tartý. Ekinshisi – pasıvti boıkot", - dedi ol.
Opozısıalyq toptardyń arasyndaǵy eski alaýyzdyq, bir múddege birikpeý bar ekeni baıqalady. Ámirjan Qosanovtyń da "qarjy tapshy", "ýaqyt tapshy" degen sózi bir baılamnyń shetin kórsetkendeı boldy.
"Ne bel ketedi, ne belbeý ketedi" demekshi, bel býǵan atqaminerlerdiń arasyndaǵy báseke kezekten tys prezıdenttik saılaý kórkin qyzdyra túsetini anyq.
