Báıge dúbri jaqyndaǵan saıyn aýyzdyǵymen alysqan arda azamattardyń da túrli tásildegi nasıhaty, halyqqa úndeýi kóbeıýde.

Solardyń biri – 1991 jyly saılaýǵa qatysýǵa ótinish bildirip, artynsha tómengi mejedegi daýysty jınaı almaǵany úshin qatyspaı qalǵan azamat Hasen Qoja-Ahmet.

Jasynyń 75-ke kelgenine qaramastan ózin usynǵan qozǵalystardyń meselin qaıtarmaı, saılaýda qaıta baq synaýǵa bel býyp otyrǵan Hasen Qoja-Ahmet halyqty óziniń kandıdatýrasyn qoldaýǵa shaqyrdy.

Óziniń "Jeltoqsan" kóterilisine qatysyp, túrli eńbekterdi jazǵany úshin sotty bolǵan úmitker óz pikirin áleýmettik jelidegi beınematerıalda ashyq bildirip, túrli taraptyń baǵytyna birqatar syn aıtty.

"Men saılaýǵa qatyspaımyn dep úıde jatyr edim. "Azat", "Alash" jáne "Jeltoqsan" qozǵalystarynyń músheleri maǵan úmit artyp otyrǵandaryn aıtyp, emeýrin tanytty. Endi qaıta baq synap kórýge bel býdyq. Meni qoldańyzdar! Qazaqstannyń ishki jáne syrtqy máseleleriniń barlyǵyn bilemin. Solardy birge shesheıik! Maǵan daýys berińizder!" - dedi Hasen Qoja-Ahmet.

Sonymen qatar, úmitkerlikten úmitti azamat óziniń kóligi joqtyǵyn, bir bólmeli páterde turatynyn da jasyrmady.

Ózin halyq arasyndaǵy belsendi ári kóshbasshy atqaminer retin kóretinderdiń senimin aqtaýǵa ýáde bergen ol jurtshylyqty barynsha saılaýǵa qatysýǵa shaqyrdy.