Memlekettik bilim berý granttary Ulttyq biryńǵaı testileý men keshendi testileýdiń nátıjesindegi bal arqyly konkýrstyq negizde bólinbek. Bul týraly QR Bilim jáne ǵylym mınıstrligi málimdedi.
Bilim berý granttary bilim berý baǵdarlamalarynyń toptary boıynsha beıindik pánder baǵytyna sáıkes bólinetin bolady. Sonymen qatar, grantty taǵaıyndaý konkýrsynda tórt bilim berý baǵdarlamasyn tańdaýǵa múmkindik beriledi.
Mysaly, bıologıa men hımıa pánderin tańdaǵandar:
"Hımıa muǵalimderin daıarlaý";
"Bıologıalyq jáne sabaqtas ǵylymdar";
"Veterınarıa";
"Jalpy medısına" sıaqty bilim berý baǵdarlamalarynyń toptaryn tańdaý múmkindigine ıe.
Eger shyǵarmashylyq emtıhan qamtylǵan bolsa, onda bilim berý grantyn taǵaıyndaý konkýrsynda oǵan bir ǵana bilim berý baǵdarlamalar tobyn tańdaý múmkindigi beriledi.
Mysaly, shyǵarmashylyq emtıhandy qamtıtyn "Bastapqy áskerı daıyndyq" mamandyǵyna qujatyn tapsyratyndar tek qana "Bastapqy áskerı daıyndyq muǵalimderin daıarlaý" sıaqty bir bilim berý baǵdarlamalar tobyn ǵana tańdaı alady.
Bilim berý baǵdarlamalary toptarynyń tizimi Ulttyq testileý ortalyǵynyń saıtynda kórsetilgen.
Bilim berý baǵdarlamalary toptary boıynsha granttar sany bekitilgennen keıin QR BǴM jáne Ulttyq testileý ortalyǵynyń saıttarynda jarıalanatyn bolady.
Al grantty jeńip alǵan soń joǵary oqý ornyna qabyldaý kezinde taǵy da naqty bilim berý baǵdarlamasyn tańdaýyńyz kerek bolady.
Mysaly, "Hımıa muǵalimderin daıarlaý" bilim berý baǵdarlamalarynyń toby boıynsha grant ıegeri bolsańyz, onda joǵary oqý ornyna qabyldanǵanda "Hımıa" nemese "Hımıa-Bıologıa" boıynsha bilim berý baǵdarlamasynyń bireýin tańdaý qajet.
