Búgin «Samuryq-Qazyna» UÁQ» AQ qoldaýymen Aqtaý teńiz portynan Qazaqstannyń alǵashqy «Túrkistan» fıderlik kemesi Baký portyna jol tartty.

İs-sharaǵa «Samuryq-Qazyna» Ulttyq ál-aýqat qory» AQ Basqarma tóraǵasy Ahmetjan Esimov, Mańǵystaý oblysynyń ákimi Eraly Toǵjanov, «Qazaqstan temir joly» AQ Basqarma tóraǵasy Saýat Myńbaev jáne «QazMunaıGaz» AQ Basqarma tóraǵasy Alık Aıdarbaev qatysty.

 Fıderlik kemeler apta saıyn qatynaıtyn bolady. Qytaıdan Eýropaǵa baǵyttalǵan tranzıttik júk shoǵyrlanyp, qazaqstandyq eksporttyq júkpen birge konteınerlermen jedel tasymaldanady. Osylaısha, Altynkól shekaralyq beketiniń logıstıkalyq ınfraqurylymyn, «Horgos-SHyǵys qaqpasy» AEA-nyń qurǵaq portyn, Aqtaý teńiz portyn belsendi paıdalaný Qazaqstan aýmaǵy arqyly tranzıttik tasymaldaýdyń tıimdiligin qamtamasyz etedi.

 «Búgin elimiz úshin tarıhı oqıǵa – Qazaqstanda tuńǵysh ret Aqtaý men Baký arasyndaǵy fıderlik jeli iske qosyldy.  «Samuryq-Qazyna» qorynyń aktıvterin sınergıalaý jáne Kaspıı teńizindegi fıderlik konteınerlik qyzmetti iske qosý osy baǵytty jáne jalpy aımaqty  damytý úshin barynsha mýltıplıkatıvti áser alýǵa múmkindik beredi»,-dep atap ótti Ahmetjan Esimov.

 Tasymaldaýdy tıimdi josparlaǵan jaǵdaıda fıderlik keme qatynasy konteınerlik poıyzdardyń jyldamdyǵyn qadaǵalaýdy qamtamasyz etýmen qatar, Transkaspıı halyqaralyq kólik baǵyty boıynsha júk tasymaldarynyń artýyna jáne Kaspıı aımaǵynda júk konteınerlerin odan ári damytýǵa yqpal etedi.

 Bul baǵyt «Nurly jol» ınfraqurylymyn damytý baǵdarlamasyna sáıkes ashyldy.