"Belgili telejýrnalıst, bilikti maman Bıbigúl Jeksenbaı «Astana» telearnasynyń bas dırektory bolyp taǵaıyndaldy. Búgin telearnaǵa arnaıy baryp, ujymǵa jańa basshyny tanystyrdym". Bul týraly "Nur Otan" partıasy Tóraǵasynyń Birinshi orynbasary Maýlen Áshimbaev óziniń feısbýk paraqshasynda habarlady.

–Bıbigúl Jeksenbaı otandyq aqparat aıdynynda aty qalyptasqan kásibı jýrnalıs. Ál-Farabı atyndaǵy Qazaq Ulttyq ýnıversıtetiniń jýrnalısıka fakúltetin bitirgen. Sondaı-aq bıznes-basqarý magıstri. Eńbek jolyn qatardaǵy korespondentten bastap elimizdegi iri buqaralyq aqparat quraldarynyń top-menedjerine deıin kóterildi. Atap aıtqanda, «Habar» agenttiginde, «Qazaqstan» ulttyq telearnasynda jáne «Jetinshi arnada» jaýapty qyzmetter atqaryp, ózine júktelgen mindetterdi múltiksiz oryndaı bildi.

Bıbigúl Nurǵalıqyzy kóptegen telejobalar men derekti fılmderdiń avtory jáne «Bas redaktorlar klýbynyń» prezıdenti retinde de óziniń joǵary uıymdastyrýshylyq qabiletin kórsetti. Qandaı qyzmette bolsa da tek talantty jýrnalıs, myqty medıa-menedjer, kásibı maman jáne bilikti basshy retinde ǵana tanyldy.

Sondyqtan Bıbigúl Jeksenbaı jańa qyzmette de belsendilik tanytyp, «Astana» telearnasynyń odan ári damýyna tyń serpin beredi dep senemiz. Sol jolda Bıbigúl Nurǵalıqyzyna jáne barsha telearna ujymyna shyǵarmashylyq tabys pen sarqylmas shabyt tileımin!,–dedi Máýlen Áshimbaev.