Almaty qalasyndaǵy halyqqa qyzmet kórsetý ortalyqtaryna meken-jaı anyqtamasyn alý qyzmetine júgingen stýdentter sany kúrt artqan degen qaýeset jeldeı esip júr. Máseleniń mán-jaıyn anyqtamaq bolǵan Azattyq tilshisi jýrnalısik zertteý ári saýalnama jasaǵan-dy.

Alǵash bolyp kamera nysanyna ilikken stýdent qyz meken-jaı anyqtamasyn fakúltet basshylyǵy suratqanyn aıtady. Biraq oǵan qujattyń ne úshin qajet bolǵanyn túsindirip beretin adam tabylmapty-mys.

Stýdent qyzdan meken-jaı anyqtamasynyń qajettiligi ne úshin týyndaǵanyn qaıta suraǵanda, ol «Saılaýǵa shyǵar...» degen dúdámal jaýap qaıtardy. Jýrnalısiń ekinshi oǵy (suraq) atyldy:

- Sizderdi saılaýǵa daıyndap jatyr ma sonda?

- Iá...

Tilshi Medeý aýdandyq HQO-dan shyǵyp, shahardaǵy eń beldi ýnıversıtetke bet aldy. Ýnıversıtettiń bas ǵımaraty aldynda Ál-Farabı atyndaǵy QazUÝ rektory – Ǵalymqaıyr Mutanovty jolyqtyryp, odan atalmysh jaǵdaıǵa qatysty pikir bildirýin surady.

Biraq JOO basshysy "Keremet" stýdentter men magıstranttarǵa qyzmet kórsetý ortalyǵynyń jumys jasap turǵanyn, stýdentterdiń aýdandyq HQO qyzmetterine júginbeıtinin alǵa tartty.

Desek te, aýdandyq HQO basshysy sońǵy eki kúnde atalǵan qyzmetti alý maqsatynda keletin stýdentterdiń sany kúrt artqan.

"Olarǵa meken-jaı anyqtamasynyń nege kerek bolǵanyn, ne maqsatta suratqanynan biz beıhabarmyz. Bizge kelgen stýdentterdiń deni tórt ýnıversıtetten: ál-Farabı at. QazUÝ, Qazaq Ulttyq agrarlyq ýnıversıteti, Qazaq Ulttyq tehnıkalyq ýnıversıteti jáne Turan ýnıversıteti", - deıdi Medeý aýdandyq HQO basshysy Almagúl Ataǵarova.

Ekinshi bolyp pikir aıtýǵa yqylas tanytqan stýdent jigit óziniń muǵalim tapsyrmasymen kelgenin jaıyp saldy.

"Bizge fakúltet basshylyǵynan meken-jaı anyqtamasyn ótkizý týraly buıryq keldi. Apta sońyna deıin tapsyrýdy mindettedi. Ne úshin ekenin túsindirgen de joq", - deıdi QazUÝ stýdenti.

Sonymen qatar, tilshi ál-Farabı atyndaǵy QazUÝ-dyń Zań fakúltetine de bardy kókeıtesti saýaldaryn arqalap.

"Biz ony suratqan joqpyz, suratpaımyz da. Bizde ýnıversıtet júıesi bar. Sol júıede ár stýdenttiń anketasy ornalasqan. Bizge meken-jaı anyqtamasynyń keregi ne?!" - deıdi fakúltet dekanatynyń qyzmetkeri Aıkórkem Ádilova.

Oqý eshqashan orǵa ıtermeıdi, al ustaz uraǵa jyǵyp júrmesin: stýdentterdiń demokratıalyq quqyqtaryna qol suǵýshylyq oryn almaýy tıis.