Ulttyq ekzıt-poll málimetinshe, Ýkraınadaǵy prezıdent saılaýynyń ekinshi aınalymynda Vladımır Zelenskıı jeńiske jetti.

"Zelenskııde – 73,2 paıyz, Poroshenkoda – 25,3 paıyz daýys jınaldy", - dep málimdedi Ilka Kýcherıev atyndaǵy "Demokratıalyq ınsıatıvalar" qorynyń dırektory Irına Bekeshkına brıfıń barysynda.

"112 Ýkraına" telearnasynda jarıalanǵan ekzıt-poll kórsetkishine súıensek, Zelenskııdi eldiń shyǵys bóliginiń 88 paıyzy, Poroshenkony 12 paıyzy qoldaǵan. Al batysta Zelenskıı 56,4, Poroshenko 43,6 paıyz daýys jınapty. Ýkraınanyń ortalyq aımaqtarynyń halqy 72,3 paıyz daýysyn Zelenskııge berse, Poroshenkonyń qanjyǵasynda 27,7 paıyz daýys. Eldiń ońtústik óńirinen Zelenskıı 86 paıyz daýysty, al Poroshenko 14 paıyz daýysty alǵan.

Zelenskıı ekzıt-poll kórsetkishteri týraly sóz sóılep, Ýkraına halqynyń senimin aqtaýǵa ýáde berdi.

"Qurmetti, ýkraınalyqtar! Kelesi aıda men prezıdent postyn bosatamyn. Ýkraınalyqtardyń basym bóligi osylaı sheshim qabyldasa, men ony túsinýge tyrysamyn", - dedi óz kezeginde Petr Poroshenko.

Saılaýdyń ekinshi týry jeksenbi kúni ótti. Oǵan Ýkraınanyń qazirgi prezıdenti Petr Poroshenko men birinshi týrdyń kóshbasshysy Volodımır Zelenskıı qatysty.

Ýkraınanyń İİM men OSK mekemeleriniń aıtýynsha, ázirge daýys nátıjesine áser eterlikteı zań buzýshylyqtar oryn almaǵan.

Usynǵan: Ádilet Mádenıet